Jowai : Ka seiñ Khasi Jaintia National Union (KJNU), da e yaroh ko iwa khroo ya u Deputy Commissioner ka West Jaiñtia Hills District u Arunkumar Khembhavi, uwa man leh kam u Chairman ka District Selection Committee (DSC), ka West Jaiñtia Hills District, hei yatoh wa ka exam neibynta ka post Demonstrator (Jr I) yong ka tnat Soil and Water Conservation, kawa da pynman da ka DSC ha Government Boys Higher Secondary School, Jowai ha kani ka 6 Naisaphra 2016, kawa man sakhiat kawa khooid wei kawa laibait.
Ka seiñ ha ka khubor wa da e ko da ong, “kani man ko ka sien kawa nyngkong wa ki bor ka DSC da ye sakhiat ki u pyllai bait ya ka Exam wei wow e laad sakhiat ya kiwa emhok wow yoh yeini i kreh”.
Ka seiñ da ong ko wa ini i pyrchang ka DSC daw pynsakhiat wa ki khynnah kiwa stat sakhiat wow yoh yeini i kreh.
U President ka KJNU u Niman N Shadap da ong u wa kani man ko ka nongmuna ya kiwi tawan kiwa kwah kreh wow man ki kiwa chimkhia wow minot lada kwah khih sorkar ki.
Discussion about this post