Jowai: Ka Khasi Students’ Union (KSU) Narpuh Circle kam chibynta i ya krehlang wei e mynsien ya kitu wa embynta u kreh miet wa sngi yow paitbniah wei wow sylli (Screening) ya kiwa yah kari næ ki bru wa wan psiah haka jylla, ynne ka sngi ka seiñ hapoh i yahkhmat u President u K.S. Suchiang, Vice President u Phanuel Tongper, General Secretary u Sanatomba Bamon wa ki kattu katni ki dkhot da lai hiar ki cha i thaw wada booh yow paitbniah ya kiwa psiah, heiwa ka seiñ da chem ko yei kreh chitom wei pynrkhiñ yaki kari wa wan na baar.
“Hawa kylli, uwi na ki wakreh ka chnat i chait i khiah ong u wa mar soo ngut hap ki wow kreh hapoh 24 kynta. Da siat dawai leh ya waroh ki kari wa psiah, katwa ki pulit Umkiang won pynman ki yei talasi hajan yiñgkieng Malidor yow chim yukheiñ wei Register ya waroh ki kari wa psiah chapoh ka jylla,” ong kiwa yahkhmat ka seiñ.
Heiyatoh won wei psiah ki kari Ambulance kiwa na baar Jylla man ka sngi, da ong wa ki pulit ka Ratacherra da dep paitbniah ki wei chah du ya uwa kjut wow em hapoh Ambulance wa kynthup ya uwa yah itæ leh toh yaki Emergency.
Ka seiñ da e ko i yaroh ya ka chnat sorkar hajrong i kreh chitom wow paitbniah wei heijooh i por kyntu ko ya ki paidbah u e i yakrehlang waka sorkar, neibhah kamwa man kattæ cha ki thaaiñ nongkyndong ki paidbah kheiñstiñ ki wow bood yei kyndon sikai ka sorkar wym hoi u yalang chithaw don wei yajngai iwi yei wi (Social Distancing).
Kamwa da yoo wa kani ka kjut COVID-19 nangku ko man ka sngi, da kyntu leh yaki paidbah wow man kiwa husiar, wei yakrehlang yow jop yaka thma hanla hadooh kamwa man kattæ ka jylla dang lait ko na ini i kjut.
Kani toh katkam ka kyrwoh wada pynlait da u SS Suchiang, Publicity Secretary KSU Narpuh Circle.
Discussion about this post