Ka Meghalaya Medical Services Association (MMSA) da yaroh ko ya ka chnat i chait i khiah ka sorkar Meghalaya yei ye ko wow pyndooh yei duna Doctor hapoh ka jylla deiwa pynkrehkaam da ka Meghalaya Medical Recruitment Board (MMRB) hapoh i yahkhmat u Principal Secretary, u Sampath Kumar wa u Commissioner & Secretary, u Dr. Joram Beda.
Deiwa em kani ka MMRB da ye wow thung kreh 400 ngut ki Doctor thymme ha u Duyatra (Jan) uni u snem iwa man kam u moomær yow pynbha pynmiat yei kaam sumaar sukhær ha ki thaw sumaar wa em ha Meghalaya.
Chooh chooh da ong wa kani ka MMRB da pynsuk bha ko yei thung kreh wei da man i leh iwa khooid wei da yarap i chiboon ya ki thaw sumaar wa em cha palatsor wa ki thaw ki wym pu em Doctor.
Ini i chimkhia ka sorkar ym du wa pyndap ko yeiwa duna Doctor tangwa da pynkhlan ko leh yei e sumaar iwa da ktah bha nachwa neidaw wym biang Doctor wei ini da pynyoo leh yei kreh chitom wow booh yei chait i khiah hakhmat dooh.
Kamtæ ka Meghalaya Medical Services Association (MMSA) da pynsñiaw ko yei sñiawngooh ya ka chnat kawa da pynkylla dur yei kaam sumaar sukhær neibynta i bha i miat yong uwi pa uwi uwa chong chnong.
Discussion about this post