I yoh u Prime Minister, Narendra Modi hei nyngkong ha ka ‘Global Leader Approval Tracker’ wa leh da ka seiñ na America kawa tip kam ka Morning Consult heiwa da yoh nyngkong u ya waroh kiwi kiwa yahkhmat ki ri ynnin ka sngi kam uwa ngait bha ki bru oo hapoh ka ri kamwa 70% da wanrah ko yei yaroh na para wa yahkhmat ka BJP.
Katkam ka yukheiñ ka Morning Consult u Modi wa yoh nyngkong u deiwa yoh 70%, da bood ya oo da u President ka Mexico, u López Obrador uwa yoh 66% wa u Prime Minister ka Italy, u Mario Draghi uwa yoh 58%.
Ini i chim yukheiñ toh iwa pynthymme man ka 7 sngi deiwa kylli na ki 11,000 ngut ki bru wa em hapoh ka ri.
Kiwa boon ki Montri ka sorkar pyrdi, wa ki heh ka BJP lyngba u Twitter da pynsñiaw ki yei sarong wei da e khublei ki ya u Modi uwa man kam uwa yahkhmat wa ka-it dooh ki paidbah ha pyrthai.
Neiliang u Home Minister, u Amit Shah da ong u wa ini toh pynyoo yei chaniah ki bru kamjooh i kreh chitom u Modi yow pynmim ya waroh wei yow ye u kyrchaan pyn ya idæ hapoh ka ri kitæ ka ‘Antyodaya’ wa ‘Aatmanirbhar Bharat’.
U Minister of Law & Justice u Kiren Rijiju da ong u wa nadooh u 2019 nadooh wa chim yukheiñ ka Morning Consult, u Modi da yoh u yei mynjur ki paidbah wa neh bait palat 60%.
