U Montri Rangbah ka jylla, u Conrad K Sangma ynne da ong u wa ka bynta wa haphrang dooh yong ka sorkar toh i puræ puthi wei hanla em chiboon i eh i khoo, ka sorkar u yaleh ko wow pynmiat ya ki thaw puræ deiwa sdang ya ki Programme wa ha rukom ha ka jylla.
Da ong u wa ki thaw puræ kamjooh ki rukom esikai ymye ki wow kylla ha ka chi sngi donhi tangwa ka sorkar da leh ko katwa ye wa joh i bor ko wow poi cha kani ka thong.
Ya ini da ong u Conrad hawa wai ya ka yung skur wa thymme ka St. Anne’s School ha chnong Garagre, South West Garo Hills, heiwa da yaroh u ya ki seiñ niam wa da pynkylla ki ya ki thaw puræ hapoh ka jylla.
Da pynbna u leh wa da pynlait poisa neibynta ki Solar Light wa ki Computer ya kani ka skur wa em ha khappood wa ka Bangladesh.
Ya kani yung wa thymme ka St. Anne’s School, Garagre da wai hei emlang u Bishop ka Tura, u Rt. Rev. Andrew R Marak, Auxiliary Bishop Jose CJ wa kiwi kiwi heiwa ki khynnah da pynphooh ki ya ka sngi da ki rwai wa ki chaad.
Ya kani ka skur da chna dei e yarap poisa ki bru samen wa kamjooh na ki khynroo khyllood (Teenager) na Germany kiwa da pynlang poisa nei rwai Christmas Carol.
Neiliang u Bishop Jose da e khublei u ya u Montri Rangbah wa ka sorkar wa da kyrchaan ko ya ki seiñ niam ha i puræ puthi hapoh ka jylla.
U Bishop ka Tura, u Rt. Rev Andrew R Marak da pynkynmoo u leh ya ki kyntien u (T) Purno A Sangma, uwa da ong wa i thung bru man i bynta wa kongsan bha, wei i puræ puthi toh iwa emkaam bha heiwa ki seiñ niam da yarap ki wow pynku ha waroh ki kdong ki chmiang.
