U Lat ka jylla u Tathagata Roy da yaroh u yei miat ka Meghalaya kawa ye wow yakob wa kiwi ki jylla ka ri kamjooh ki ri hapoh ka Europe hadooh wa da khut leh yaka kam ka Scotland of the East. Da ong u yeini hawa e yei klam haka Webinar hajrong ka Ek Bharat Shreshtha Bharat (EBSB) wa pynman daka Press Information Bureau, Lucknow deiwa ya krehlang waka PIB Meghalaya wa Arunachal Pradesh ynnin ka sngi.
I thong wa kongsan kani ka Webinar toh wow wanrah yei ya sñiawthooh wei wow ya tip chaphang kiwi ki jylla deiwa ya e buit ya ki kaam wa bha wa da ye ki wow leh kamjooh ya iwa da chem ki. Hapoh ka EBSB, ka Uttar Pradesh da booh lang yaka wa ka Meghalaya wa Arunachal Pradesh.
U Lat hawa e yei klam ha kani ka Virtual Seminar, da ong u wa kam kini ki Workshop man ki kiwa emkaam bha neidaw wa ka thaaiñ North East India toh kawa dang duna wa tip chaphang yong ka. Da ong u leh wa i pynemkaam ya i ktien ‘Mainstream’ wa toh du ki kattu kani ki bynta ka ri, da man i iwa bakla neibhah ka Meghalaya wa Arunachal leh man ki chibynta ka Mainstream India kam wa man hi ka Delhi wa Uttar Pradesh.
Da ong u leh wa ki thaw uiñke suwari hapoh ka jylla dang em boon ki thaw wa dang ye wow chem thymme wei da kynmoo tympang u leh ya i por yong oo kam u khynnah ha Shillong.
U Lat da e u leh yei batai bniah heiyatoh wa ki jaitbru wa em hapoh ka jylla madooh ki jait ktien wa klam ki wei heiwon ki bynta ka jylla em ki. Da sñiawskem u yei em khloo ha Meghalaya hadooh 77% katwa ha kiwi ki bynta ka ri ki khloo katwa dang slem dang duna ki heiwa ka UP i khloo ko da em sa du 16%.
Da klam u leh chaphang ka wah wa khooid wa jngiar ha Dawki kawa ye wow chynna hadooh 15-20 phut cha tre. Ka Sohra kawa man leh kam kawi na ki thaw wa joor slap dooh hapoh pyrthai da kyrkhu yaka da ki kchaaid ki krem wa jrong wa yillu kiwa ym chem chawi. Ka India man ko ka ri kawa phær na iwi i bynta cha iwi wei i yatylli hapyrdi ini i yaphær ye wow chem ha Nartiang wa em ka Temple heiwa uwa lehniam toh uwa wan nyngkong na Maharashtra. Wei ini man ko ka yurim ka Ek Bharat Shreshtha Bharat katkam wa da pynwandur da u Prime Minister ka India u Narendra Modi, heiwa kawi ka jylla u yohlaad ko wow tip ya kawi won ka jylla.
U Pankaj Singh, MLA ka Uttar Pradesh, da ban joor u yei emkaam wow tip yaka dustur kiwi ki wei da khut u leh ya ki bru ka Meghalaya wow wan cha ka Uttar Pradesh yow yoo yaki karkhana yong ka, i rukom pynlai ya iwi i mar na kawi ka District, i booddien yei sap yong kitu kiwa liwan biang chapoh ka jylla neidaw u COVID-19. Heijooh i por da kyntu u ya ki bru na Uttar Pradesh yow lai ke ki cha ka North East neidaw wa waroh em i hapoh kawi ka tnoom yung.
U Manoj Dixit Former, VC, Dr. RML Avadh University, Ayodhya da ong u wa i thong yong ka Tourism toh yow wanrah yei ya sñiawthooh deiwa yachem ki bru na kawi ka jylla wa kawi. I yatipmit ya sñiawthooh uwi ya uwi toh iwa ye wow pynkhlan yaka India.
Ya kani ka Webinar da pynlai da u ADG Region Lucknow u RP Saroj wei da chibynta lang da kiwa chemphang haka kaam puræ puthi waki Journalists ki 3 tylli ki jylla.
