Haka yaseiñ Samla Khasi Jaiñtia Presbyterian Assembly kawa chiphaw wa da pynman haka Balang Presbyterian Mustem, District Mustem, Jowai Presbytery KJP Synod Mihngi ynne ka sngi, u Pastor I.W. Nongseij hawa e yei klam haka yaseiñ pyrdi da pynchong yurim u naka Gospel u Lukas lynnong 19 dkhot 39.
Ka phang pyrdi yong ka khubor toh heiyatoh i lai luti u Jisu cha nongbah Jerusalem kam u syiem, chi tayaw chwa wow chah sah narphna u.
U Pastor da ong u wa, “Kam uwa da em i sñiawthooh yei yi wa daw jia ya oo, u Jisu manda poi u haka thaw watip ka Bethania chwa u poi Jerusalem da phah u yaki synran yong oo wow lai pynlait ya u khon kada uwa da chah kdoh wei wow wan yah cha oo”.
U Pastor da ong u wa i pynemkaam u Jisu ya u khon kada toh wa em u i thmu wakhroo cha lyndet, wei ka dak wa chim u kawi toh i man jemnood kam u khon kada uwa dang khian wei chidur chisur najrong wa man uwa sñiawkhian.
Heiyatoh wa ki paidbah wa wan cha kani ka yaseiñ ong u, “Em sakhiat hi i mo itæ i mynsien sñiawkhian, i jemnood, i man chida hei chakri wei mane yong i yow Blai, kamwa u khon kada leh da pynyoo u nadooh wa ki synran u Jisu pynlait ki oo nei chah kdoh wei lai bait cha u Jisu kamjooh hadooh wapoi ha Jerusalem”.
Ong haroh u wa lada sñiawthooh sakhiat i wa u Blai khut jied u ya i, wei iyi emkaam u ya i, itæ toh i kmen wa khroo tam.
“Ym phær lada u Blai jied u heiwon iwon i man i long la hei man khynnah, khynroo, tymmen wa toh oo pait u yei dohnood neibynta u pynemkaam u ha kawon kawon ka bynta wa oo yoo biang u”.
Chooh chooh u Blai ye u wow jied ha kawon kawon ka kaam wow kreh u khih, la hei shynchaar khadar, hei kaam kreh ophis wa kiwi.
Da pynkut u yei klam deiwa ong wa u Blai u kyrkhu haroh u heiyatoh i pynkhreh yaka Good Friday wa daw wan dei mynsien wym wow kylla ktien kylla dien wa heithaw wow ong Halleluiah u ong pathan sah narphna.
Haka yaseiñ heipor 10:30 i step won da yoh i klam na u Pastor K. Pariat. Neitæ da yoh leh i rwai Choir naka Jingiaseng Samla Balang Thadlaboh, naka Jingiaseiñ Samla Balang Umsaw Khwan, naka Jingiaseiñ Samla Balang Mairang, naka Standing Choir Jingiaseng Samla KJP Synod Sepngi, naka Standing Choir Jingiaseng Samla KJP Synod Mihngi waka Jingiaseiñ Samla Balang Mustem.
