Ynne ka sngi katwa hapoh ka Dorbar Lyiur ka Jaiñtia Hills Autonomous District Council dang yaklam ki heiyatoh i kulmar wa jia khah khah ha chnong Khanduli lyngba ka yukylli wa da wanrah da u MDC ka liang pyrchah, u Awhai Andrew Shullai, ha pchem ka Jaiñtia Hills Autonomous District Council won wan mih ka seiñ JSM wow kbai khyrha pynrem joor yaki MDC JHADC deiwa pynbaad wym jooh em por ki u yaklam u ang næ leh iyi iyi hajrong i wan booh Entry Tax Gate ka Karbi Anglong Autonomous Council (KAAC) ha chnong Khanduli.
Kiwa yahkhmat ka JSM wa kynthup u R. Biam, President ka JSM Western Region, u Wellson Siangshai Education Secretary JSM-CB wa kiwi ong ki wa ka Tax Gate toh kawa da booh hapoh u pood ka Meghalaya wei lada ka sorkar ym leh ko iyi iyi, ka seiñ daw pynman ko dei yakhih.
Hawa kyruiñ won cha i yaklam hapoh yung dorbar katkam ka yukylli wa u Andrew Shullai da kylli u wa lada ka Khanduli haap hi ko mo cha Karbi Anglong?, u EM Incharge, u F. Bareh da jubab u wa haap ko hapoh u pood u ang ka Jaiñtia Hills Autonomous District Council wei wot wa u waheh chnong yong ka leh da tipmit da ka Council.
Kamtæ u Andrew Shullai wa u Robinus Syngkon da kylli ki wa ileh won ka Council wym em leh ko iyi iyi hajrong i wan booh Tax Gate ka KAAC ha Khanduli iwa hei yong sakhiat kam ka Council toh u pynyoo dak ko yei mantre, lym kamtæ ka Assam daw chlur chooh chooh ko u tia.
U E.M. da jubab biang u wa haka 14 tarik daw em i yachem lang hapyrdi ki bor sorkar na Meghalaya wa Assam neibynta u yaklam biang hajrong ini i eh i khoo, kamtæ ka liang pyrchah da hun ko deiwa yooluti wow man i kaam wa jop.
Najrong ka Khanduli, ki MDC ka liang pyrchah da booh yukylli haroh hi heiyatoh i dooh tulop kiwa kreh da boon ki bnai, neitæ hajrong i khrong dan ka District Council naki Check Point, i e License cha ki baar jylla wa hajrong i yoh poisa naka 15th Finance Commission neibynta u snem 2022-2023 wa kiwi kiwi de ki phang.
