Jowai: Kam chibynta wow pteiñ yei lehkmen dap 50 snem ka Kiang Nangbah Government College, ynne ka sngi da pynman ya ki yakop Debate, Spelling Bee wa ka Debate.
Da sdang nyngkong da ka Debate heiwa da yatai nia hajrong ka phang wa i wan ka rel hapoh ka jylla daw wanrah ko ya ka roi ka paar hapoh ka jylla Meghalaya namo “Extension of Railway Line will bring Development to the state of Meghalaya.”
Kiwa chimbynta kiwa puræ ha kani ka College da yatai nia heiwa kiwa kyrchaan yei wan ka rel da ong ki wa daw hiar dor ki maar ki mata, daw pynyohkreh ko ya kiwa boon, daw wanrah ya kiwa boon kiwa wan uiñke suwari wa kiwi kiwi. Kiwa pyrchah won ong ki wa emkaam chwa ka sorkar u chna ko ya ki sarok wei i wan ka rel daw joor chooh chooh i psiah ki baar jylla daw dooh leh ya dustur riti wa kiwi kiwi.
Ha wa kut ka yatai nia ki paidbah da jied ki wa kiwa pyrchah ya ka phang toh ki wa jop wei ya kiwa stad dooh u ya tai nia da jied kiwa bichaar ya ka Wankaimon Swer na ka liang wa kyrchaan ya ka phang wa ar u Kyrkhu Surong wa le ka Bermiki Suchiang kiwa na ka liang pyrchah.
U S. Dey uwi na kiwa bichaar da yaroh u ya kiwa chimbynta deiwa ong wa ym em poipyrkhat u wow stad ki u klam kamwa sniaw u ynne ka sngi.
Ha ka yakop Spelling Bee won da jop ka Nishakaru Dkhar wa ar ka Sakarupaia Rymbai wa le ka Emily Sana.
Da pynkut ya kani ka yakop da ka Quiz kawa da pynkhreh bha da u F. Rumnong kawa da pynman 6 kylla kiwa tip kam ki Warm Up Round, Mastermind Round, Meghalaya Round, Sports Round, Current Affairs Round wa ka Cross Word Round.
Da wan chimbynta 4 tylli ki dhab kiwa mar ar ngut kiwa jubab ya ki phang kylli kiwa pynyoo da ki dur em da ki sur wa kiwi wei da pynkut deiwa pyndap ktien ha ka Cross Word.
Ha wa kut u Georges Pakem wa ka Bianghun Kyndait na ka Team A da jop ki deiwa yoh 80 Point wa ar da yoh u Alexander Bhoi wa u Plielad Buam na ka Team C.
Discussion about this post