Yatylli ki khynroo Meitei wa Kuki yow wanrah yei naam jop ya ka India ha ka SAFF U-16

Hanla i kynaad hapyrdi ki ar jaitbru ha Manipur dang pteiñ i, ar ngut ki khynroo kani ka jylla uwi u Meitei wa uwi u Kuki da wanrah burom ki ya ka India deiwa thap ki mar chi kool yow pynjop ya ka ri ha ka yalehke Final ka South Asian Football Federation (SAFF) Under-16 Championship Trophy.

Na ki 23 ngut kiwa yalehke ka India, 16 ngut toh kiwa na Manipur heiwa 11 ngut toh ki Meitie, 4 ngut ki Kuki wa uwi u Meitei Pangal (Manipuri Muslim) wei da yalehke ki deiwa ya krehlang yow poi chei jop.

U Bharat Lairenjam uwa na Bishnupur District da thap u ya ka kool wa nyngkong ha ka minit wa 8 katwa u Levis Zangminlun uwa na Churachandpur da thap u ya ka kool wa ar ha ka minit wa 74 pyrchah ya ka Bangladesh kawa da pynman ha Thimphu, Bhutan ha ka sngi Bibar.

Kini kiwa yalehke ka Manipur da booh ki cha rood yei sñiaw yaphær heiwa da ya sah lang ki, da ya baam lang ki da ka thong wow pynyoh yei jop ya ka ri.

Related posts

Psiah Final ka Kur Suchen Bataw ha ka Prize Money Knockout Football Tournament ka WSCSO

November 12, 2024

Super Division EJHDFA: Jop ka Dhana wa ka Ladrymbai-B

November 12, 2024

U Bharat da ong u wa sñiawkmen u wow yoh u thap ya ka kool kawa yarap wow pynjop deiwa pynrap wa hanla wan i na kiwa boon ki thaw wa ki jaitbru waphær tangwa da em kawi donhi ka thong wow ya krehlang.

Da khana u leh wa u Levis uwa yalehke kam u Midfielder chwa u sdang ka yalehke da ong u ya oo wow thaap kool yow pynjop ya ka India wei katwon won kmen chooh chooh u wa u Levis leh da thap u ya ka kool yow pynjop syndon ya ka ri.

Heiyatoh wa i long i man hapoh Manipur, u Bharat da kyrmen u wa ka jylla daw ye biang ko wow man kam nachwa hi.

U Levis won da ong u wa rap kyrbeh u hawa sdang ka yalehke Final tangwa da sñiaw skem u wa mar ya yoh u thap kool. U Levis leh man u kam uwa yalehka ka Srinidhi Deccan FC, Hyderabad.

Heiyatoh won wa iwa jia ha Manipur, u Levis da ong u wa kiwi ki lok u wa yalehke toh kiwa wan na kiwa boon ki bynta ka Manipur wei i maya yong ki wow yalehbol da pynyatylli ko ya ki wei da booh ki cha rood yei sñiaw yaphær.

U Levis da psiah u cha ka Srinidhi Deccan ynnin u snem wei da man ko i sarong ya oo kamjooh ya ka chnong u wei da kyntu u leh ya kiwa chong chnong ka Manipur wow yatylli ki yow wanrah biang yei suk.

U Abbas Shingjamayum uwa man kam u Meitei Pangal da yoh u yei naam “Most Valuable Player” wa “Top Scorer” deiwa thap le tylli ki kool wei da khana u wa ha ini i por ym jooh em yaklam ki yeiwa jia ha Manipur tangwa da pynlut yei por wow pyrkhat kammon u jop deiwa em i mynsien ya krehlang.

Hawa e yei yaraoh yeini i jop ka India, ka All Manipur Football Association (AMFA) lyngba u General Ssecretary, u Lairikyengbam Jyotirmoy Roy da ong u wa ha ki yalehke ym em wan itæ i sñiaw yaphær jaitbru ha kiwa yalehke ka India kiwa chimbynta ha ka SAFF U-16 Championship.