Ka mukotduma PIL wa da yaleh da u Kynjaimon Amse heiyatoh wa i sih u sarok nadooh na Jowai chadooh cha Ratacherra wa man leh kam chibynta u sarok National Highway-06, da chong bichaar biang ya ka da ka Meghalaya High Court ynnin ka sngi.
Da pyntip cha ka yung bichaar wa i kreh toh iwa da sdang wei da dep leh ha kiwa boon ki bynta lait noh u sarok Jowai Bypass neidaw wa u Contractor da ieh u yei kreh hadien wym ye u ya sñiawthooh yumut yei kreh wa hap u leh.
Neiliang u Additional Advocate-General, da pyntip u wa u Contractor katni da wan biang u wow leh yei kreh wei da pynmih leh ya ka Work Order yow kreh ya uni u sarok Bypass nadooh na Thadlaskein cha Mihmyntdu wei toh u pyndep noh ha u Naiynru, 2023.
Hajrong ini iwa da pyntip, neiliang ka High Court da ong ko wow chong bichaar biang yeini ha u Naiynru yow booddien kammon lai ini i kaam chakhmat.
Neiliang ka National Highways Authority of India (NHAI) da pyntip ko wa da dep pynchna ya u sarok nadooh na Jowai cha Ratacherra tangwa ya u sarok Jowai bypass won da pait da ka chnat PWD (Roads) ka jylla.
Kamwa da pynsñiaw ka High Court, da pynman leh ya ka yalang hapyrdi ka jylla waka NHAI yow pait lada ye wow e kti noh ya ka Jowai Bypass cha ka NHAI neidaw wa man u i bynta wa emkaam bha ka National Highway.
Ya kani ka mukotduma u chong bichaar biang ha ka 05-06-23.
