Le ngut ki kynthai kiwa man kam ki dkhot ka Meghalaya State Commission for Women wa kynthup ya ka Phidalia Toi kawa man kam ka Chairperson, ka Felicita Majaw kam ka dkhot waka Violet Lyngdoh leh kawa man kam ka dkhot da phah ya ki wow pynche ki yei chimbynta ki ha ka Election hanla man ki kam ki bru wa da tipmit kam kiwa kreh sorkar wei da ye wa tyngkheiñ ki ya ka aiñ Representation of the People Act, 1951 neidaw wym chah ya ki bru sorkar wow pynyoo ki cheiwon yachah ki wei kamjooh u chimbynta ha ka Election.
Ka Phidalia Toi da lai chimbynta ko hei lai paidbah hawa lai thap pyrtuid u kyrtong ka NPP na 2-Jowai Constituency u Wailadmiki Shylla ha ka 7 tarik uni u bnai.
Ka Felicita Majaw won da lai ko wow kyrchaan ya u kyrtong ka Congress , u Marbud Dkhar uwa man leh kam u kurim ko heipor wa lai thap pyrtuid u.
Ka Violet Lyngdoh won da lai ko wow thap pyrtuid kam ka kyrtong ka NPP na 6-Khliehriat Constituency heiwa da chah kyntait ko wei da leh ko yeini khlem da ieh noh yei kaam ko kam ka dkhot ka Commission iwa da emkaam u leh lada man kam kiwa kreh sorkar.
Da em leh kiwa ujor cha u Chief Electoral Officer ka jylla, u FR Kharkongor uwa da phah ya ki Election Officer ki District wow pait u ya kini ki kaam wow paan pynche wei wow pynsakhiat ya ini waroh.
