Ka chnat puræ puthi ka jylla da phah ko yei e yumut cha ka High Power Committee wow wai noh ya ki skur wa ki College kiwa em ha ka jylla nadooh ka 1 tarik Nakhynde 2021, wei ka High Power Committee wa khlieh da u Montri Rangbah daw chong ko ha kani ka tayaw yow bichaar ya ini i e yumut yong ka chnat puræ puthi.
U Montri wa pait ya ka puræ puthi ha ka jylla, u Lahkmen Rymbui da ong u wa hadien wa ka chnat da pait ko ya i long i man wa yeiwa da dooh ki khynnah skur, ka chnat da lum ko ya ka yalang wei da phah ya i e yumut cha ka Committee wa khlieh da u Montri Rangbah wow wai noh ya ki skur nadooh ka 1 tarik u bnai wow wan.
Da pyntip u wa ka chnat da e yumut ko wa ya ki College wow wai noh ha waroh kawi ka jylla kamjooh neibynta ki skur Class IX hadooh Class XII u chah wow wai noh ha waroh. Neibynta ki khynnah Class VI hadooh Class VIII ha nongkyndong ye ki wow wai noh waroh katwa ha sor u lai ki du wow ya syllok wa kiwa sikai, katwa neibynta ki Class I haduh Class V ha ki nongkyndong daw e laad wow wai noh katwa cha ki thaw sor u lai bait da ki Online Class.
U Lahkmen Rymbui da pyntip u wa hadooh ka tayaw kawa da dep, ki khynnah puræ kiwa da em 18 snem chajrong kiwa da dep wow yoh tika yada COVID-19 da em ki palat 65% heiwa da pynsñiaw u leh wa da yooluti wa hachwa wow kut uni u bnai daw em hadooh 80-90% ki khynnah kiwa da yoh tika.
Hawa yatoh wa kiwa sikai, u Lahkmen da ong u wa ka chnat da phah wei da kyrpaad ya ki wow chim ki yei tika, wei kitu kiwa wym chim, hap ki wow wanrah ya ka RT-PCR Negative Test Certificate yow pyntikna wa lait ki na u khñiang COVID-19.
