Jowai: Ka Law Commission of India ynne ka sngi da ekti ko ya ka bui ha ka sorkar pyrdi wa tip kam ka Report No.277 titled ‘Wrongful Prosecution (Miscarriage of Justice): Legal Remedies’ namo kiwa chah pynchitom bakla wa ki laad yarap ya ki.
Ka High Court ka Delhi ha ka hukum yong ka ha ka 30 Naisan, 2017 ha ka mukotduma Babloo Chauhan kawa tip leh kam ka Dabloo vs. State Govt. of NCT of Delhi, 247 (2018) DLT 31, da pynsñiaw ko yei sñiawkhia hajrong i chah pynchitom ki bru ha i kaam iwa ym em leh ki. Ka yung bichaar da pynsñiaw ko yei emkaam wow em ka aiñ wow e yarap cha kam kini ki bru wa chah pynchitom bakla deiwa kyntu ya ka Law Commission wow sylli bniah ko yeini i kaam wei wow pachat yeiwa chem ko ha ka sorkar pyrdi.
Katkam wa tip ha kylleiñ ka pyrthai, ya i chah pynchitom bakla da tip da iwi i ktien kam ka ‘miscarriage of justice’ iwa mut wow chem wa u bru ym em leh bakla u hadien wa da chah pynchitom u manda wanrah won ya ki sabut kiwa biang kiwa yada namo em neiliang yong oo.
Katkam ka aiñ International Covenant on Civil and Political Rights (‘ICCPR’, kawa da pdiang da ka ri India) da pynkhamkti ko ya ki sorkar wow chna aiñ wow yarap da ka poisa (compensate) ya kam kini ki bru wa chah pynchitom bakla.
Kani ka bui wa da ekti ynne wei da pait bniah ko ya ki aiñ ka ri India wow pynemkaam noh dei kyntien ‘wrongful prosecution’ heithaw i kyntien ‘wrongful conviction’ namo ‘wrongful incarceration’ wei ka ‘Wrongful prosecution’ u kynthup ko ya kiwa chah pynbaad, kiwa ym emkti, ki pulit, kiwa emkti wow pynman yei takit dei leh thok, wa kiwi kiwi. Daw kynthup leh yei por iwa chah kset u bru kamjooh leh i por iwa ym em chah kset, kamjooh leh ki bru kiwa chem wa emkti ki ha ki yung bichaar wa khian (trial court) tangwa hadien won ka Higher Court chem ko wa ym emkti u.
Kani ka bui da klam ko hajrong kiwa boon ki laad yarap ya kam kini ki bru deiwa pait bniah ya ki aiñ ka ri deiwa klam leh yei duna wa em ha ki yeiwa da pdiang leh da ka High Court of Delhi.
Ka Commission, da pachat ko kattu katni iwa chem ko wow pynman aiñ wow yarap ya kam kini ki bru la hei liang ka poisa poilaiñ namo kiwi ktawon ki wymtoh da ka poisa kam i sneiñ i kro, i chah sumaar, i e khih e kreh, esikai wow seiñ kreh wa kiwi kiwi.
Ka bui da pachat ko leh ya i emkaam wow booh ya ki yung bichaar wa kyrpang wow bichaar lada i yarap toh heiliang ka poisa heiwa kiwa chah ktah ye ki wow lai paan yarap. Da pachat leh ki kattu katni ki kyndon wa emkaam wow pynchiap ha ka aiñ Code of Criminal Procedure (Amendment) Bill, 2018.
Discussion about this post