Ka sorkar jylla wa ki bor pynlai ka North Eastern Hill University (NEHU) da ya phyllu yumut ki yei eh yong ki khynnah wa lai puræ iwa ye u mih neiwa pynkrehkaam ya ka Common University Entrance Test (CUET), tangwa ha ka yachem ynne ka 19 tarik hapyrdi u Montri ka chnat Puræ Puthi, u Lahkmen Rymbui wa kiwa mihkhmat ka NEHU, wa kynthup ya u Vice Chancellor, u Prof. Prabha Shankar Shukla wa u Pro-Vice Chancellor, u Prof. Henry Lamin ym em mih ka rai wa khaddooh, heiwa da rah wow yatai sani biang ha ka 21 tarik uni u bnai ryngkat wa ki Principal yong ki thaw puræ puthi kiwa em ha ka jylla.
Hawa yaklam wa Prof. Henry Lamin yong ka Department of Anthropology uwa man leh u Pro. Vice Chancellor ka NEHU, da khana u wa i yachem waka sorkar toh neidaw wa neiliang ka NEHU sñiawkhia ko hajrong i phah ka University Grants Commission (UGC) wow pynman ya ka Common University Entrance Test (CUET) neibynta ki khynnnah kiwa kwah wow wan puræ ha ki kyrdan waphær waphær. Da pynsñiaw u wa iwi na i eh wa da yachem wow pynlai ya kani toh neidaw wa tbian ware i por wei ym ye wow pynkhreh yei emkaam ya ki Center ha Khasi, Jaiñtia wa Garo Hills.
Da ong u wa katkam i tip yong oo, ka UGC da e ko du ar næ le tylli ki Center ha ka jylla, kitæ du ha Shillong, katwa ha ki bynta ka Garo Hills wa Jaintia Hills ym em iyi iyi leh. Da ong leh wa ya katni man iwa eh bha ya ki khynnah ka jylla wow psiah cha kani ka yakhun kawa kwah ka sorkar India.
Da khana u wa i yaklam wa u Montri da pynsñiaw wa dang boon sakhiat i eh wa ka sorkar ym pu man ko kawa da khreh wei wow pynbiang ya waroh i emkaam, wa ha i yatai da rai wow chong yaklam biang yow khut leh ya ki Principal yong ki College kiwa em ha ka jylla yow ya phyllu da kawon ka laad ka luti wa ki khynroo khyllod kiwa chemphang ka jylla u yoh laad ki wow lai puræ rap chajrong, wei da khana u leh wa ha ini i yachem da yaklam bniah leh wa kammon ka jylla u pait ko ya kitu ki wym yoh psiah ha kani ka yakhun wa ym toh u chah ieh beiñ lane u dooh noh yei puræ.
U Prof. Lamin da pynsñiaw u leh wa neiliang yong samen yong oo da pdiang u wa ka Policy man ko kawa bha, tangwa kiwa boon ki khynnah yong ka jylla daw yachem ki ya iwa boon i eh, neibhah wa hap ki wow wan leh na ki thaw wa jngai, hap wow pynlut ya ka bai luti wa ki thaw sah wei ini i eh waroh kiwa daw maad ki hap wow pyrkhat lang waroh, khamtam ki thaw puræ wa em cha palatsor.
Da ong u wa neiliang ka NEHU wa ka sorkar daw hap ki wow chim ya ka laad katwa ye yow pait yei bha i miat ki khynroo khyllood ka jylla, neibhah kiwa dang dep Class-XII daw man ko kawa eh wa khroo neibynta yong ki wow yoh u psiah ha ki College, tangwa da pynsñiaw u leh wa ki ym tuklar won ki ya ki Post Graduate neibhah wa rap heh wei chemphang.
Ka University Grants Commission (UGC) ha ka 21 tarik u Wisu da pynbna ko wa ym em de yei kheiñ ya ki Marks yong ka Class XII wow lai puræ ha ki kyrdan Undergraduates wa Postgraduates yong u snem 2022-23 ha ki Central University wa ki College wa da yatoh waki skurbah ka ri. Tangwa i pynpsiah Class u man bait ko lyngba ka Common University Entrance Test (CUET).
Hawa yatoh waka Common University Entrance Test (CUET), neiliang u Vice-Chancellor ka NEHU, u Prof. Prabha Shankar Shukla da ong u wa kani ka CUET ym toh kawa em yei eh, wei neliang u Montri ka chnat Puræ Puthi ka sorkar India da dep u wow e ya ka rai, ya kawa hap wow burom.
