Ye u dooh kreh da hajar ngut kiwa sikai hapoh Meghalaya wa da ki lak ngut hapoh ka ri nei rai ka SC

U Montri ka chnat Puræ Puthi ka Meghalaya, u Lahkmen Rymbui da pynsñiaw u yei khuslai wa kamwa 10,000 hadooh 15,000 ngut kiwa sikai ka jylla ki wym em pyndep ya ka Teacher Eligibility Test (TET), ye ki wow dooh yei kreh neidaw ka rai wa da pynmih da ka Supreme Court.

Da ong u wa katkam ka hukum wa da pynmih ka yung bichaar wa hakhlieh dooh ka ri ha ka 1 tarik uni u bnai, da phah ya waroh kiwa sikai wow pyndep ki ya ka TET hapoh ar snem wei neiliang ka sorkar dadep khut pynman yalang ko wa kiwa boon ki seiñ kiwa sikai kamjooh ki bru ka chnat Aiñ deilang kiwi ki chnat yow chong pyrkhat yeini.

Kawi kawa ye u leh ong u toh deiwa ya krehlang wa kiwi ki sorkar jylla yow lai kyrpaad ya ka Supreme Court yow pyrkhat deiwi yeini i rai ko.

Da pynche u leh wa ka Supreme Court da pynlait ko ya kitu kiwa sikai wa sah sa du 5 snem i e chakri ki tangwa ym chah won u pynku kyrdan namo wow yoh Promotion ki.

Related posts

Chah thang ka Office ka BJP hei yakhih dawa jylla wei dawa 6th Schedule ha Ladakh

September 24, 2025

Khut ka Seiñ Kur Dkhar ya ki khon ka kur wa em ha Jaiñtia Hills wow wan cha ka Dorbar Pyllun

September 24, 2025

Da khuslai u leh wa neidaw kani ka hukum u pynkrehkaam ka deiwa kheiñ nadooh ki por wa nachwa, daw ktah ko leh ya ki hajar ngut kiwa da man kam kiwa sikai, kamtæ da phah ya ki DSEO yow pait ki yei kyrdan kiwa man kam kiwa sikai.

Da ong u leh wa da em kiwa sikai kiwa da e ki yei chakri da 25-30 snem wei sñiawthooh hi u leh wa ka Supreme Court kwah ko wow yoh ya kiwa sikai da kiwa biang tangwa ka sorkar won ym kwah ko wow dooh kreh kiwa sikai.

Ka Supreme Court ha ka hukum wa da pynmih da ong ko wa waroh kiwa sikai kiwa nadooh Class-I hadooh Class-VIII ha ki skur Primary wa Upper Primary hap ki wow pyndep ya ka TET yow ye ki u pteiñ yei kreh tangwa neibynta ki thaw puræ wa man kam ki Minority Institutions daw bichaar bniah kammon u leh.

Ini i rai ka Supreme Court man ko leh kam wow pynkhlan ya ka Right to Education (RTE) Act, 2009 wa katkam ki kyndon ka National Council for Teacher Education (NCTE) wei ini daw ktah ko ya ki lak ngut kiwa sikai wa em hapoh ka ri kiwa sikai ha ki skur sorkar, ki skur wa yoh yarap na ka sorkar wa ki skur ki bru samen.

Ini mut i leh wa kitu kiwa yaleh kreh thymme hap ki wow pyndep ya ka TET.