Ka yalang hapyrdi ki seiñ yong ki tre wa kiwa yah Truck kiwa kit ya ki mar ki karkhana pynmih khyndaw-bilat wa ka sorkar jylla ynne, da mynjur wow e yei dawa ya ka Meghalaya Commercial Truck Owners and Driver’s Association (MCTODA).
Katkam iwa ong u Symbood Montri Rangbah uwa pait leh ya ka chnat Transport, u Sniawbhalang Dhar, i dor yong i khyndaw-bilat ye i wow ku dor hadien wa da mynjur wow su Rs. 9 chi Ton chi Kilometer. Da ong u wa ha ka yalang da yaklam hajrong ini i rai wow em biang i ya pynbait hapyrdi ki karkhana pynmih khyndaw-bilat wa ki seiñ yong kiwa yah Truck neibynta i dor khnang wym ktah ya ki paidbah.
U Sniawbhalang Dhar da ong u leh wa ha ka yalang da mynjur leh wow e u kit 120 kari ki tre jylla chi sngi deiwa pynku na ka 80 Truck chi sngi ha ki por wa dadep, heiwa da pyntip u leh nadooh mynstep ka sngi daw e wow kit noh 100 kari ya ki tre chnong wa sa 20 Truck daw pynbood ha ki kajiak sngi.
Hawa yatoh wa i dawa wow su i jooh ka bai kit lada lai cha baar ka jylla, u Sniawbhalang da ong u wa hadien wa da yasyllok wa ka chnat aiñ wa kynthup wa u Advocate General, da chem wa ka sorkar jylla ym ye ko wow rai ya ka bai kit lada lai cha baar ka jylla.
Hawa kylli hajrong i chah kem wei chah pynngat kyndon aiñ ki le ngut kiwa yahkhmat ka MCTODA, u Sniawbhalang da ong u kani ka kaam haap ko hapoh ka chnat Kaam Pohyung wei daw yachem u wa u Symbood Montri Rangbah uwa pait ya ini i kaam.
Discussion about this post