Jowai : Katkam ka yutip wa yoh na ka Office u DC ka West Jaiñtia Hills da ong wa la chisnem wa da lai neiliang ka ophis u DC ka da pyrchang ko u thooh laad yow beh ya kiwa chong dai rood sarok (Hawkers) ha Jowai wei da phah leh ya ki notice cha kiwa chong dai yow kyrriah thaw dai ki na ki thaw lai kjat ki paidbah.
Da dep beh leh da boonsien ya kiwa chongdai hadooh wow knieh ya ki mar dai ki wei da li booh ya ki cha ka office ka Municipal. Tangwa pyn ha ka sngi wa bood da wan chong dai biang ki ha rood sakor wa ha ki thaw lai kjat ki paidbah.
Ha kawi ka wa beh ya kiwa dai rood sarok (Eviction Drive) da em leh u wa kreh ka municipal wa da mynso deiwa chah dat mo u ha kiwa dai rood sarok.
Neiliang ka ophis u DC da ong leh em boon ki Iaw ha Jowai kam yong ka CNI, Seiñraij, Iaw Chyiap wa kiwi kiwi tangwa du neidaw wow lait bai dan ki iwa T. 20 chisngi da li chong dai cha rood sarok cha ki thaw lai kjat ki paidbah iwa booh yei ma ya kiwa lai kjat nadooh ki khynnah hadooh kiwa heh.
Kamtæ u DC da ong u wa ym ye u yang hadooh wa em kiwa mynsoo da pyrkhat ki wow pynkrehkaam noh da ka kyndon Section 101 yong ka aiñ Meghalaya Police Act 2010 kawa ong wa u SP namo kiwon kiwa da pynkup bor da oo yow kyrriah thaw ya kiwa pynwit yei lai i wan ki paidbah wei u pyndaiñ kuna ya ki T. 5000.
Chwa u pynkrehkaam ya kani ka aiñ u DC da khut u ya waroh yow e buit wa kammon u lai cha khmat hei yatoh wa kiwa dai rood sarok.
Da e nongmuna u DC leh ya ka mukotduma wa yatoh wa ki wa dai rood sarok ha Mumbai heiwa ka Supreme Court da rai ko wa ym ye kiwa dai u pyndooh yei hok kiwa lai kjat deiwa chim ki ya ki thaw wa lai kjat ki paidbah.
Read Also : Chah beh chah tympra kiwa chongdai ha ki luti synkieñ Iawmusiang ha ki bor synchar district
Discussion about this post