Ye u pynmih kamwa 700 liter i dud chi sngi naka 1200 liter wa emkaam ha WJH

Jowai: Ka yung krehkaam ka District Animal Husbandry and Veterinary, WJH ynne ka sngi da leh warom ko ya ka National Milk Day ha ka yalang wa pynman ha Jowai Dairy Plant Campu, Mooralong heiwa u West Jaiñtia Hills Deputy Commissioner u Garod LSN Dykes da man u kam u kongsan.

U kongsan hei klam yong oo da ong u wa i dud toh iwi na ki jait baam jait dih wa emkaam wow em ki jait baam jait dih yong i iwa yarap yei chait i khiah ya waroh nadooh kiwa dang khian hadooh kiwa da heh.

Da ong u wa hawa kyruiñ cha iwa chem hapoh ka jylla, ka West Jaiñtia Hills District da kheiñ ya ka kam ka ‘Critical District’ hei yatoh wa ki baam wa tei yei doh i pran khamtam ki baam wa emkaam u baam kiwa dang khai khynroo khyllood wei man ki kiwa ym dap baam neidaw wa ym em biang ki jait baam wa baam ki.

Kamtæ da pynchlur u ya waroh ki manyung khamtam kiwa em cha nongkyndong wow sñiawthooh ki yei emkaam i dud wei lada waroh ki bru dih dud ki, daw yarap ko leh ya kiwa boon u yoh kreh ki.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

U B. Dkhar, Dairy Plant Officer ha ki ktien wai phang yong oo da ong u wa ya kani ka sngi da man ko leh ka lehwarom ya ka sngi kha u Dr. Verghese Kurien uwa tip kam u Father of the White Revolution wei i thong yong kani ka sngi toh wow pynsñiawthooh paidbah yei emkaam i dud wa kiwi ki baam wa pynmih na i dud ha i baam i dih.

Da pyntip leh wa ye u pynmih kamwa 700 liter i dud chi sngi naka 1200 liter wa emkaam ha WJH.

Hajrong kani ka thong da pynman ya ki yakob thoh Essay, yakop draw ha ka 10 tarik uni u bnai ha Government Boys Higher Secondary School, Jowai hajrong ka phang ‘Pasteurized Milk’ wa ‘Innovative Dairy Farming’, heiwa kiwa jop da yoh ki ya ka song poisa, mementos wa ki certificate.

Ha kani ka sngi da e khusnaam leh cha ki ar ngut ki bru kiwa pynbiang dud cha ka Jowai Dairy  Plant, wa kynthup ya u Philanderwell Lyngdoh na Jowai uwa da leh ya ini nadooh u snem 1989 wa u Marcolus Lyngdoh na Mowkaiaw nadooh u snem 1991.

Kani ka yung krehkaam da e sñiawbha ko leh da ka poisa wa i dud cha ka KJP Synnod Mihngi Orphanage Home, Wahiajer wa cha ka NEIMA Orphanage Home, Sahsniang.