Ka Shillong All Faith Forum (SAFF) ynne ka sngi da pynsñiaw ko ha ka sorkar jylla wa lada i man i long ka khlam COVID-19 rap bha i ya ki thaw mane Blai næ ki yungmane ye wow wai biang noh ha ka tayaw wa nyngkong u Nichiphaw.
Ka yalang ynne ka sngi hapyrdi ka SAFF wa ka sorkar ka da phyllu bha ya ki laad ki luti wow ye u wai biang ya waroh ki yungmane wa em ha ka jylla.
Hawa yaklam wa ki laad pathai khubor, u Symbood Montri Rangbah ka jylla, u Prestone Tynsong da ong wa ka Forum da pynsñsniaw ko ha ka sorkar wa da pynkhreh ki wow wai noh ya ki yungmane ha u Naichiphaw lada i long i man ka khlam rap bha ko, deiwa pynksan wa hanlada ka jylla ha kini ki kajiak sngi da sakhi ko yei ku kiwa yoh COVID-19, wei dang ye u khoom u kdoh lada wyrchaw wa kiwi tawon ki jylla.
Ha ka yalang da chna leh ya kawi ka Sub Committee wow khlieh da u Chief Secretary wa ki dkhot na ka SAFF, wei kani ka committee daw bichaar bniah biang ya ki Standard Operating Procedure (SOP) næ Protocol wa da wanrah da ka sorkar 2 bnai nachwa.
Katkam i ong u Prestone, emkaam wow bichaar biang ya ki SOP toh hadien wa ha ki kajiak sngi wa da lai, neiliang ka Ministry of Home Affairs (MHA) da pynbna ko wa du 100 ngut ye ki wow psiah ha ki yungmane Blai.
Da ong u wa ki yungmane ha ka jylla biang ki wei heh ki heiwa ye ki wow kdup hadooh palat 1000 ngut ki bru ryngkat ryngkat i jngai kamwa 2 meter.
