Ynnin ka sngi neiliang ka Institute of Hotel Management (IHM), Shillong da pynman ko ya ka Career Counselling deiwa ya krehlang waka District Employment Career Counselling & Placement Cell (DECCPC), Jowai ha Government Girls’ Higher Secondary School, Jowai heiwa da yoh myntoi 75 ngut ki khynnah wa puræ Class-XII kani ka skur.
Ka IHM, Shillong man ko kam kawi na ki skurbah yong ka ri India kawa e sikai ha kiwa boon ki jait kaam kiwa yatoh wa ka Hotel Management.
Hawa sdang ya kani ka Career Counselling da yoh yei kyntien pdian sñiawbha na ka W. Sumer, Principal ka Govt. Girls’ HSS wei da bood won sa i klam wa tbian na u L. Suchen, Skill Development Officer, Jowai uwa da batai kajiak ya ki kaam kawa ka yung krehkaam yong oo da e yarap ko lyngba ki e sikai namo ki Training ya ki khynnah ha kiwa boon ki kaam yow ye ki u seiñ khih dei yong ki hi wei kamjooh leh yow ye ki u yoh kreh.
Hadien ini, ka J. Langstieh waka M. Hrangkhawl, Lecturer yong ka IHM, Shillong da batai bniah ki yei myntoi wa ye u yoh hadien wa dep pure na IHM wei da khana ki wa em ko leh ka Course kawa dei mynkna kawa jrong hadooh 8 tayaaw kam ka “Hunar Se Rozgar Tak” ya ki khynnah wa da dep puræ Class-X wei em haroh ka Diploma Course kawa chisnem chiteiñ ya ki khynnah Class-X wa ka Degree Course kawa 3 snem ya kiwa da dep Class-XII.
Batai haroh ki wa manda dep Training ki khynnah ye ki wow seiñ khih da i yong ki hi deiwa booh Restaurant, Guest House, Hotel wei wow kreh ha ki Airlines, Cruise Ship, ki Hotel heh ha ri næ cha baar ri leh kamjooh.
Da khana leh wa ki khynnah manda dep puræ ki, ym emkaam lai thooh kreh ki neibhah da pna wan hi ki Company wa heh u jied ya ki deilang wa tulop wa heh. Pyntip ki leh wa em chiboon ki jait kaam wa hikai ki heipor Training wei ye ki leh u yoh kaam sorkar kamwa man kiwi kiwa puræ Degree neibhah ka Certificate yong ka IHM toh kawa yoh na Jawaharlal Nehru University (JNU), Delhi.
Hadien kani em sa ka Interaction Session heiwa ki khynnah da yoh laad ki wow kylli yei wym sñiawthooh ki næ iwa artatien ki.
Ki kynnah kiwa em thmu wow lai puræ ye ki wow pait chwa ha website ka IHM (https://ihmshillong.nic.in/) kamjooh ha ki Social Media Account yong ka wei ye leh u lai psiah hi ha IHM wow tip katwon ka bai puræ wa kiwi kiwi de i lut i sep waroh.
Hadien ini da yoh ya ki kyntien e khublei na ka B. Lyngdoh Mawnai, Employment Officer deilang i e mynsien ya ki khynnah wow pyrkhat bha ki ya ki jait puræ wa kwah ki u lai.
Discussion about this post