Ka Dorbar Chnong Panaliar, Jowai ha ka Executive Committee yong kawa dang dep chong, da pynskem weiwa da sdang ko u pynkrehkaam ya ki aiñ chnong yong ka heiyatoh wa kiwa wan yalap Election hapoh wa cha baar ka chnong.
Ki aiñ hi kiwa da jooh pynkrehkaam nadooh ki Election nachwa, heiwa:
Da khang pyrchah ya kiwa mih næ psiah chapoh ka chnong la dei kari næ kjat kiwa pyn awri awra næ tem pynheh sur.
Ym chah u uiñ dei miet dei synyaaw chapoh ka chnong, khamtam la chem kiwa saam poisa, u pynchitom deiwa joor bha, dep tæ u e cha ki bor sorkar.
Ym chah leh u pynriam (Decorate) ya ka Yungwalieh næ Stage ha ki yalang paidbah, wei wym chah leh u e cha.
U chah 10 (chiphaw) ngut donhi wa kynthuplang wa u kyrtong (Candidate) u psiah næ poi chapoh ka chnong ha ka sngi wow man yalang; heiwa du 2 (ar) tylli donhi ki kari khian u chah u psiah cha u pood ka chnong. Ya ki wow psiah daw e da ki Badge na ka chnong.
Uwi donhi u wow klam neibynta u kyrtong, uwa na baar chnong dep tæ yoh u klam won u kyrtong.
Ki Party Unit kiwa kwah u e burom ya u kyrtong yong ki, toh u yoh bor chwa ki na u Waheh Chnong chi sngi chwa wow man yalang wei ki bru samen ym ye ki u leh yeini.
Kiwon kiwon ki kyrtong wa pynman yalang chajan ka chnong Panaliar, u ong ki ya kiwa kyrchaan yong ki wa ymtoh u li booh kari næ uiñ chapoh u pood u ang ka chnong.
Kiwon kiwon kiwa leh pyrchah næ tyngkheiñ ya ki aiñ ka chnong, u pyndam ya ka yalang yong ki.
