Shillong: Ka sorkar Meghalaya dang bichaar ko wow pynyinsur ya i khang chnong (Lockdown) ha kani ka jylla, hadien wa ka sorkar pyrdi da e yumut ko wow pynyinsur noh khamtam ha ki thaw kiwa ym em u chah ktah ha ka khlam u COVID-19.
Hawa u Symbood Montri Rangbah ka jylla, u Prestone Tynsong da ong, u wa hadien wa jia wa nyngkong dooh ha ka 12 tarik uni u bnai wei da mih chooh chooh kiwa yoh ya uni u khñiang ha ka jylla, ka sorkar da pynbna ko wa ya ka East Khasi Hills da kheiñ kam kawa rap maa namo ka Hotspot (Red Zone).
Da ong u wa hajrong i e yumut na ka Ministry of Home Affairs (MHA) wow pynyinsur ya ka Lockdown, ka sorkar ha ka yalang yong ki montri ynne ka sngi da yaklam wow pynyinsur ya ki kattu katni ki bynta, wei da phah ya u Chief Secretary ka jylla wow pait u yeini, laitnoh ya ka East Khasi Hills.
Hawa kylli chooh chooh, u Prestone da ong u wa kamwa man katni i pynyinsur ya ka Lockdown ha East Khasi Hills ympu man i tangwa ha kiwi ki District da ekti ha u CS wow pait bniaah u wei wow pyntip cha ka sorkar wow chim ya ka rai.
Discussion about this post