Ye wow sepai i thmu lilam ka sorkar ya ki Distribution Circle ka MeECL wa joor i pyrchah

I thmu ka sorkar wow ekti ya ki artylli ki Distribution Circle ka MeECL cha ka REC Power Distribution Company Limited (RECPDCL) ye i wow sepai noh hadien wa joor i pyrchah na kiwa boon wa kynthup ya ki seiñbhalang, ki seiñ saiñhima wa ki MLA kamjooh leh ki montri ka sorkar MDA.

Kam wow kdaw heini ki 7 ngut ki MLA na Ri-loom Jaiñtia wa kynthup na ka NPP, UDP wa Congress, kiwa kynthup ya ki 3 ngut ki Montri hapoh ka sorkar da yatylli ki wow pyrchah joor yeini i thmu wow lilam ya ka Eastern Distribution Circle wa ka Shillong Distribution Circle cha ka RECPDCL wei kamjooh leh wow ekti wow pynlai ya ka Leshka-Myntdu Hydel Project cha ki Company wa na baar jylla.

Nei joor i pyrchah, ka dhab ki montri namo ka Cabinet ka jylla ha ka sngi Thohdieñ da hap boohteiñ ko ya ini i thmu wow lilam ya ka MeECL cha ki Company, heiwa da rai wow chong pyrkhat biang yeini ha ka sngi Walang ka 9 tarik.

Hawa yaklam wa u President ka People’s Democratic Front (PDF) uwa man leh u montri ha ka sorkar jylla, u Banteidor da ong u wa ka Party pyrchah joor ko ya ini i thmu ka sorkar deiwa pyntip leh wa kiwa boon na ki Montri ym sñiawsuk ki yeini iwa da pynbor wow kyrriah sngi biang ya i jooh wow yaklam ha kawi tawon ka yalang ka wow man ha ka 9 tarik uni u bnai.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Da ong u leh wa ini i thmu ka sorkar daw ktah i ya ki paidbah ka jylla wa ya ka mynried yong ki deiwa pynrap leh wa ka Party kwah ko wow pynbait chwa yei eh i khoo hapoh ka chnat khnang wow lai bait i krehkaam ka MeECL.

U Banteidor da ong u wa kamwa man katni ha ka MeECL em ko chiboon i kynrum kynram wa joor dei kyrmen wa ka sorkar u raikut ko ha ka 9 tarik  uni u bnai.

Hawa kylli, da ong u wa ini i thmu ym toh u man ko kawa mihsoh neibhah man ko pyrchah wei ym yahap wa i mon yong ki kiwa chong chnong ka jylla, neibhah kam kiwa mihkhmat ka sorkar leh neibynta ki paidbah ym ye ki wow pdiang ya ini i thmu ka sorkar wei toh u pyndam chisyndon.

Heijooh i por u MLA ka BJP, u AL Hek da ong u wa da dang yaklam sani hajrong ini tangwa ym hun ki Montri deiwa pynrap leh wa lada em iwon iwon i rai toh u man i neibynta i myntoi ki paidbah wei kam ka Party leh sñiaw ko wa emkaam wow yaklam bniah chwa wow chim yei rai.

Chooh chooh u Hek da ong u wa i kynrum kynram ha ka MeECL toh iwa da slem, wei iwa emkaam katni toh wa ka chnat bordiñ u pynbait chwa ya jar jiar i yung, katwa na ka sorkar daw pyrchang ko katwa ye u yarap ya ka chnat.