Kam chibynta wow pynchlur wei wow pynsñiawthooh ya kiwa thap Vote, da pynman ya ka Systematic Voters’ Education and Electoral Participation (SVEEP) da ka yung krehkaam u Deputy Commissioner (Election), West Jaiñtia Hills District heiwa da em leh ka tem ka put wa i klam yow e mynsien ya kiwa thap Vote kamjooh yow tip ki yei hok yong ki kam kiwa thap Vote wei wow em leh i kitkhlieh kam kiwa chong chnong.
Ya kani ka yalang da pynman hei janmiet ka 20 tarik hei thaw pynyieñ ki kari kamai Ummulong ha Iawmusiang, Jowai.
Neiliang u Additional Deputy Commissioner, u M.A. Challam, da pynkynmoo u ya ki paidbah wa kam kiwa chong chnong em ki ya ka hok wow thap Vote hapoh ka synchaar paidbah.
Da ban joor u wow man kiwa husiar ha kini ki por Election hei chah pynbiej kam ha ka poisa wa kiwi de. Da pynchlur u leh wow chimbynta wow pyntip lada chem ki kiwon kiwon kiwa pynbiej bru da kiwon kiwon ki laad wei wow ujor yeini lyngba ka Mobile App cVigil wa da chna da ka ECI.
Ha kani ka yalang da wan wow sakhi da kiwa boon ki bru kiwa da ya chaad lehkmen ya ki sur wa da tem da ki Nexus wa ki Lynx. Da em leh i chaad wa i rwai tynre na ka Seiñ Raij Jowai wa ki chaad da ka Lucy wa u Mynnu.
Da rwai leh ya i sur wa kyrpang da u District SVEEP Icon, u Paloi uwa man u dkhot ka Chi Iung.
