Shillong: Ka Union Minister for Women & Child Development and Textiles, ka Smriti Zubin Irani ynne ka sngi da wan ko cha jylla Meghalaya yow pait yei pynkreh yaka National Institute of Fashion Technology (NIFT) kawa em ha Mawdiangdiang heiwa da emlang u montri rangbah ka jylla u Conrad K Sangma.
Ka montri da pynsñiaw ko yei miat kani ka thaw deiwa ong wa man ko kawa miat bha na kiwi ki NIFT Campus kiwa dang chna katni, “Nga hap yaroh O ya kani ka thaw wada chna ya kani ka NIFT kawa man leh kawa miat dooh na waroh ki thaw wa em ka NIFT Campus hapoh ka ri”. Da pyntip ko leh wa ye u wai noh ya kani ka thaw puræ e sikai soor, sikai thaiñ that ha u Khonchonglad (Nov) uni u snem neidaw i kreh da ye u pyndep hadooh 98.95%.
Ya kani ka NIFT Campus da chna hei thaw wa heh kamwa 20.13 Acre iwa da e mynkna ka sorkar jylla iwa em ha Mawdiangdiang iwa jngai kamwa 7.4 Km na Shillong, wei i chna da sdang nadooh u snem 2013.
Ka Irani wa u Conrad da pynman ki leh yaka yalang wow boodien yei pynkrehkaam ya ki Scheme hapoh ka Social Welfare Department waka Health & Family Welfare Department, ka sorkar Meghalaya khamtam yei pynkrehkaam ka chnat Women & Child Development. Da yaklam ki leh wa ki Deputy Commissioners ki waroh ki District ka jylla lyngba ka Video Conferencing.
Da boodien ko leh ya i pynkrehkaam yaka POSHAN Abhiyan wa i pynkhreh yaka Poshan Month ka wow pynman ha u Naikhynde.
Yaka POSHAN Abhiyaan da sdang ha u snem 2018 da ka thong wow pynduna yeiwa ktah i heh i san ki khynnah kynthai yow pynduna leh yei duna ya i baam wa tei khamtam ya ki kynthai wa dang khai khyllood kamjoooh ki manbei yow lait na i kjut duna snam wei wow kha khon kiwa duna i khia.
Discussion about this post