Ka seiñ Volunteer for a Better Jaiñtia (VBJ) kawa da kreh neibynta wow biang u dap wei myntoi ki khon ka Ri Jaiñtia, ynne ka sngi da khut kyrpang ko ka yalang ha Yungwalieh ka dong Tpep-Pale, Jowai heiwa ki manbei manpa wa imsngi u kamai jakpoh dei krehnong krehmylla na kylleiñ ki chnong ka West Jaiñtia Hills da wan ki wow ya embynta.
U Phrangsngi Sutnga, Convener Volunteer for a Better Jaiñtia kam u chongknor da kdar u wow pynsñiaw ki kyntien yahkhmat hajrong ka thong wei thmu yong kani ka yalang katwa ka Daioophi Iakai, Convener Volunteer for a Better Jaiñtia da khana pynsniaw ko yei yaklam wa mih hadien i wan yachem wa ki heh ka Food and Supply, West Jaiñtia Hills.
Kat kam i khana ka Daioophi, da ong wa neiliang ka yung krehkaam ka Food and Supply, West Jaiñtia Hills da dep phah lut ko ya ki Application yong kitu kiwa dang yaleh thymme ya ki Card Ration cha Shillong neitæ da ong ki leh neibynta wow yoh ya ka Card Ration wa thymme daw hap u leh thymme ya ka Census ka ri kawa dang sahteiñ u pyndep hadien wa wan ka khlam COVID-19.
Hajrong i khana ka Daioophi kiwa boon ki manbei dap ki dei khia pyrkhat wei ñiawliar ñiawtang yei leh ka sorkar neibynta wow yoh yei hok yong ki kam ki khon ka ri India watoh hok toh bynta u yoh ya utæ u khoo rachon, khoo mynkna katkam wa da mang bhah da ka sorkar na Delhi.
U Khroo Lamsalanki Pariat hei chimbynta ha kani ka yalang, da khana u ya ki rukom yoh myntoi yong ki khon ka ri India na ki le tylli ki Card Ration katkam wa da mang bhah da ka sorkar na Delhi kiwa kynthup ya ka AAY Card, PHH Card wa ka Non-NFSA Card.
Chooh chooh neiliang u Lamsalanki kam u bru wa sñiawkhia yei dooh hok dooh myntoi ki khon ka Ri Jaiñtia lyngba ki Card Ration katkam wa da mang bhah kyrpang neibynta kawi pa kawi ka manyung wa em ha u laiñ yong i dooh i duk, kiwa imsngi u kamai u psa khon du nei krehnong krehmylla deiwa likhih likreh i sngi u baam i miet, dukkha i sñiaw yong oo heiwa da ong u leh i por dawa ko ya waroh ki khon ka Ri Jaiñtia khamtam kitu kiwa em ha u laiñ yong i tymbuiñ i dooh wow yieñ tylli ki deiwi i sur u dawa yei hok yong ki na ki bor sorkar deiwa yakrehlang wa kiwa saam rachon wa ki waheh chnong.
Hadien i yaklam ya tuklar wa sani bha ya ki bynta wa yatoh wei rukom yoh khoo yong ki manyung næ ki manbei wa da em Card Ration kamjooh ya ki bynta wa yatoh wa kitu ki manyung næ manbei ki wym pu yoh Card Ration hadien wa da dep yaleh (Apply) da ki boon snem, mih ki rai na kani ka yalang kiwa ong kamni næ- U thoh cha ka sorkar Meghalaya kamjooh cha ka sorkar India yow pynjhan u sdang noh ki u leh ya ka Census yow lai bait i yoh rachon yong kitu ki bru watoh hok u yoh, u yachem wa ki bru stat aiñ neibynta wow booh yei dawa cha ka yung bichaar Meghalaya High Court lada emkaam, u pynbor ya ka sorkar la kammon kammon toh u yoh Card Ration ki bru watoh hok hapoh u bnai March 2024 neitæ u dawa leh na ka sorkar wa u e Card Ration leh cha waroh kitu kiwa da dep li booh kot booh sla ha ka yung krehkaam yong ka chnat Food and Supply nadooh u snem 2020-21.
