Yieñ u Adelbert wow klam dei ktien Khasi yow pyrchah yei klam Hindi u Lat

U Adelbert Nongrum, MLA ka North Shillong, ynne deiwa yoh bor na u Lamphang ka yung dorbar chna aiñ da yieñ u wow klam dei ktien Khasi kam ka dak wow pyrchah yei klam u Lat dei ktien Hindi hapoh dorbar wei yei wym em leh puræ u Lat ya waroh iwa da thoh da ka sorkar ha ka sngi sdang kani ka dorbar mang tangka.

U Lamphang da e bor u wow klam u Adelbert katkam ka kyndon pynlai dorbar heiwa yeiwa klam da pynkylla chei ktien English wei da saam cha waroh ki dkhot ka yung dorbar.

U Adelbert da ong u wa iwa leh u Lat da man ko pyrchah yaka Article 176 ka riti synchaar ka ri wei da dep jia kamni ha West Bengal heiwa ya u Lat da hap wow pynbor ya oo wow puræ yeiwa sdang wei yeiwa kut donhi, ha Kerala won u Lat da ieh u kattu katni ya iwa da thoh ka sorkar katwa ha Tamil Nadu won da kyntait u Lat tang wow puræ leh.

Hei sñiaw u Adelbert da ong u ini wa da jia cha kiwi ki jylla toh neidaw wa em i sñiaw yaphær hapyrdi ka sorkar jylla waka sorkar pyrdi tangwa hapoh Meghalaya won ym ye u mutdur iyi em i sñiaw yaphær.

Related posts

Dam noh ka NPP wow kyrchaan ya ka sorkar ka Manipur wa yahkhmat da ka BJP

November 17, 2024

Wa thung ka BJP da ki bru yong hi tæ mih i kynrum kynram ha NEHU: Ronnie

November 15, 2024

Heiyatoh wa i klam u Lat dei ktien Hindi, u Adelbert da ong u wa ka ktien Hindi toh ka Official Language ka ri India wa da tipmit leh da ka Constitution tangwa ka Hindi ymtoh ka National Language tangwa hapoh ka jylla da em ka aiñ wa ki kyndon wa da ong wa yaka dorbar hap pynlai dei ktien English katwa ka Rule 28 chah ko ya ki MLA wow klam dei ktien yong ki lada pynkylla yeiwa klam ki chei ktien English deiwa saam cha ki dkhot ka yung dorbar.

Kamtæ hajrong ini da ong u wa u Lat ymtoh u MLA wei ka sorkar India toh u sñiawthooh ko wow thung da u Lat wa sñiawthooh yei ktien yow suk i emyatoh hapyrdi ka sorkar jylla waka sorkar pyrdi.

Da pynkynmoo u leh wa yaka jylla Meghalaya da seiñ deiwa yatylli ki paidbah nadooh ki Garo wa ki Khasi yow yieñlang wow pyrchah yei pynbor yow klam dei ktien Hindi kam ka Official Language.

Chooh chooh da ong u wa nadooh nachwa hadooh katni dang em ka pyrchah yei pynbor klam Hindi neibhah ym ye wow pynbor wow pynriam da i jooh i rong na khlieh ha tre ka ri India neibhah emkaam wow burom yei man kyrpang kiwa boon ki jaitbru.

Hajrong kini waroh da ong u wa pyrchah yei klam u Lat dei ktien Hindi.