Iwi i Video wa da sdang poor bha kattæ ha ki rynsan Social Media da wanrah i yei yania hadien wa uwi u bru da yieñ u hapoh ka liensuiñ yow yalap niam Christan wei da dawai Blai u leh neibynta kiwa lai luti.
Ini da jia i ha ka 27-01-25 ha ka lieñsuiñ wa lai na Chennai cha Tuticorin heiwa uwi uwa pynpoor ya ini i Video da ong u wa ini pynyoo i yei leh chiliang i rukom sñiaw ki bru neibhah em kiwa chah u leh kamni katwa kiwi won ym chah u leh ki khamtam hapoh Tamil Nadu.
Uni u bru uwa da yieñ wow klam, da khana u wa i pyrtuid u toh u Wilson Maduram uwa na Thoothukudi wei da e khublei u ya kiwa em hapoh ka lieñsuiñ hei pyrtuid u Jisu Christ wei da klam u leh da ki kyntien wa em hapoh ka Bible wa hadooh katwon u Blai maya u ya ka pyrthai hadooh wa phah u da u khon u wei waroh kiwa ngait ha oo u yoh ki dei im wym kut de.
Da ong u leh wa u Blai maya u ya waroh heiwa da sdang u leh wow duwai Blai yow poi thaw dei suk.
Ha ini i Video ym em wa pyrchah næ pynsangeh wei pynchong ya uni u bru tangwa ki bru won ha ki Social Media da ong ki wa lada jia cha luti syngkieñ ini dang ye u yut tangwa kamni ym em thaw de wei ini da man ko kamwa chah pyndik ki bru.
Uwi won da ong u wa lada ki bru beiñ ki ya ki Hindu kiwa kbai Jai Shri Ram ha ki thaw paidbah, toh u beiñ ki leh ya uni u bru wei lada ym beiñ pynyoo yei leh chiliang wei pynchlur i leh yei chongchit niam.
Uwi won da ong u wa ymtoh u chah kamni lait noh lada lai u da ka lieñsuiñ kawa yong oo hi.
Discussion about this post