Ka TUR ka yieñ ko wow kyrchaan ya ki warep wa kiwa chong chnong yong ki chnong waphær waphær kiwa em ha ka Raid Lynshing kiwa em tymbud ka wah Umngot.
Ka TUR da ong ko wa ka sorkar jylla lyngba ki bor District, Meghalaya Pollution Control Board wa ka chnat MeCEL da pyrchang ki wow pynman ya ka Public Hearing ynne ka sngi ha ka chnong Siangkhnai, wei kani ka Public Hearing toh hajrong ka Environment Impact Assessment wow chna ya ka Dam ha wah Umngot, heiwa kani ka Environmental Impact Assessment leh man ko kawa dap da i duna wei kawa tkoh bha.
Kamtæ ki warep wa kiwa chong chnong yong ki chnong waphær waphær hapoh ka Raid Lynshing Hima Khyrim da yieñ ki wow pyrchah joor ya kani ka Public Hearing.
Ka TUR da dawa ko wa toh u pyndam syndon yei thmu wow chna ya ka Dam ha ka wah Umngot.
Ka TUR da kyntu ko leh ya kiwi ki chnong kiwa cha chilliang ka wah Umngot ha West Jaintia hills District wow pyrchah ya i chna ya katai ka Dam.
Da ong leh wa ki Dam toh kiwa pynsih yaka rymaw wei pynyap ki yei kamai ja-kpoh kiwa chong chnong khamtam dooh ya ki warep.
Ka sorkar toh u yarap ko chiboon ka poisa yow kyrchaan ya ki warep, ym toh u pynlut ke ha ki Dam, pynkut ka kyrwoh naka TUR.
