Ka Hynñiewtrep Youth Council Narpuh Circle haka kyrwoh na u Publicity Secretary ka seiñ u Pyndap Syiemlieh da ong u wa ka seiñ da chrai wei sñiawkhia ko hadooh kattæ kattæ hajrong i yoh Environmental Clearance ka Star Cement naka sorkar pyrdi wow pynheh ya ka ka paar moochuni kawa em ha ka chnong Brichyrnot, Narpuh Elaka, East Jaiñtia Hills.
Ka seiñ da ong ko wa ini ym toh iwa ye u pdiang da kammon kammon leh neibhah hapyrdi i pyrchah ki paaid chong chnong ka thaaiñ wei khlem da pynman ya ka Public Hearing wei ini toh i thombor næ i yoohbeiñ yei hok ki paidbah khlem da mynjur lang katkam i sur u paidbah deiwa pynrap wa ka seiñ wa ka sorkar MDA hapoh i yahkhmat u Conrad K Sangma toh ka sorkar wa dai lilam neibhah hawa tip skem ka Wildlife Sanctuary em ko pyn ha chrooh hi wa ka Wah Lukha tangwa kammon ym ye wow pyndooh næ wow khang yei e bor namo ka Clearance.
Kamtæ da ong wa lada ka Star Cement yoh ko wow tih moochuni ha itai i thaw, ka Wah Lukha daw sih noh ko wei daw ktah leh ya ki doh-um, doh-wah wa ki mrad leh daw doohjait næ daw yut noh ki wei i kylli wa mih toh lada ka Meghalaya State Pollution Control Board (MSPCB) toh ka wow yada ya ka rymaw namo ka wow yarap u pynjæd, pynsih ya ka rymaw.
Hajrong ini waroh, neiliang ka seiñ da klam che ko wow yieñ skem bait haka yurim wow pyrchah bait lada man katwa man, lada jia katwa jia leh wei ym pyndem ha kiwa na baar wow kjit yaka spah ka kamai yong ka ri wa maya yong i kamwa pyndem kiwi kiwa chet kylla ya ka jaitbru deiwa chah pynbiej ha ini itai wei da yoo lakam wa ka sorkar jylla ym embor ko iyi iyi hakhmat ka Star Cement wei ka seiñ da kyntu ko ya ka sorkar wow sangeh noh chi syndon wow e Clearance ya ka Star Cement.
