Hadien wada dooh da dam kamwa 50 snem ha Jowai, ya ka Chaad Sukra da pynkhai im biang ya ka da ka bei Seiñraij ha u snem 2006. Ka Chaad Sukra mut ko ka chaad kawa pynyoo yaka Dustur ka Riti yong i ki Pnar nadooh ki por kiwa nynde.
I kyntien Chaad Sukra mut i, i chaad dei wa suk wei sñiaw kara, i chaad dei kyndeh i mynsien deiwa eh wa khlan wa em dei kmen wei ka-it ka-sar. Da pynman ya ka Chaad Sukra hachwa wow pynhap yow symbe u phniang ha ki pynthor ki bhiang kam ka dak ka wow e ngooh kyrpang ya ka Bei Rym-aw kawa e thaw ya i u chong wasa hajrong i doh i pran yong ka wei kawa e baam e dih ya i da ki soh ki symbe yong ka kamjooh leh ya ki Ryngkaw ki Samun, ki Blai Chnong ki Blai Raij kiwa kyrkhu kyrdoh kiwa da ker ya ka chnong ka thaw.
Na ki por nynde, boon hi na kiwa chaad man ki, ki kynthai hei riam i bait yong i dahi nadooh ki Thoh saru, ki muka, ki ryndia ki khyrwang sa ki kpieñ ki paila ki wow pynphooh-rong kiwa chaad rong.
Ya kani ka Chaad ha ka juk kawa katni, katwon wa yoo chongkun wei yoo chongchit u ya chaad lang chirup chirup ki chynrang kawa nang pynphooh pynphieñ chooh chooh ya kani ka chaad.
Ka Chaad Sukra chisien hi wada poi ko mut wada toh i por i samoi wow hiar rep noh cha ki pynthor ki hali. Kani ka chaad wanrah ko yei mynsien ya maya wei ya tylli ha pyrdi ki nongchong chnong waroh, i sñiaw jen wei sniaw chi payu wei man ko leh ka laad wow pynyoo ya ka sap ka phong la hei rwai hei chna sur hei put i tem kamjooh leh hei chaad i kyn-iaw. Pynkynmoo ko yei leh sa chisien ya ki chaad kiwa pynchoh nood kam i Chaad Pyllah, i Chaad Tana, i Chaad Kyrwoh wa i chaad Pynjaw. Ka Chaad Sukra hapoh ki thawaner ka Bei Seinraij da pynman ha ki ar sngi kynthih “Ka Lehke” wa ka “Mih Iaw”.
Ka Lehke mut ko ka leh Drama kawa pyn wyr-ngia wei wa kit yumut la ha ka imlang sahlang nae ha ka Dustur ka Riti. Katwa ha ka sngi wabood won kawa man ka Sngi Mih Iaw da sdang ya ka daka yalang yong lang ha Mynkoi Pyrdi (Loom Pyrdi Ïongpiah) deilang wa ki klam i kape i snein i kroo na ki waheh ki wasian weiwa da pynchong chit chooh chooh sa ki chaad yongrim kiwa ha rukom.
Da pynbood yeini sa ka Chaad surok Mih-Iaw heiwa waroh ki khon ka Bei Seinraij da yachaad kynbrum deilang wa ki sur ki rwai kiwa pynsawa ya ka Chnong ka thaw nadooh na Mynkoi pyrdi hadooh wapoi ha Iaw Musiang, heini leh da em ka chaad pynyoo sap da ki Khynroo Khyllood kamjooh ki manbei manpa. Katwon wa yoo kynjai sa ki pra khon ka Niamtre wa najen wa na jngai wa yachimbynta lang ki heini. Neini won da pynkut da ka Chaad sarok cha ki bynta wa pher yong ka Chnong ka thaw hachwa wow poi cha i bynta iwa khaddooh ha Mynkoi Pyrdi sa ka miet wow pyn wyr-ngia yei ngiah i jrem da ki Chaad pynjaw ki chaad kper syntu na ki Dong ki Chnong wapher wapher.
Ka Chaad Sukra man ko kam ka yit ka wow pynyoo yei phooh i phien ka Dustur ka Riti yong i kamjooh kawa pyntipmit ya i hakhmat ka pyrthai. Sa chisien man ko ka khubor wa wanrah yei suk i kmen, i chong suk chong sain ya waroh lang.
Ka Chaad Sukra kawa suk kawa kmen ya phi waroh!!
Chihajar Ngooh.
Discussion about this post