Ka North Eastern Electric Power Corporation Limited (NEEPCO) da pynsñiaw ko yei wym bien de u pynkreh ya ka 500 Megawatt Thermal Power Project kawa da toh u chna ha Garo Hills wei neiliang ka sorkar leh da mynjur ko wow pyndam noh ya kini ki kreh.
U Montri ka chnat Bordiñ, u AT Mondal da ong u wa ka NEEPCO ym bien de ko wow kreh ya kani ka Thermal Power Project neidaw wa da man ko katni kam ka Green Company neibhah ki Thermal Power Plant toh kiwa pynemkaam da u mooyong yow pynmih ya ka bordiñ.
Ka soskular wow chna ya kani ka Thermal Power Plant toh kawa da ya soi badooh ka 17-03-2011.
Heiyatoh won waka Kynshi Stage-II leh da pyntip u wym lai de chakhmat wei kani toh ka 325 Megawatt Hydroelectric Power Project.
Da ong u wa kani ka Company da kwah ko wow chna noh hei rukom wa thymme deiwa pynkylla yeiwa da dep wow ya mynjur wei deiwa pynemkaam da ki stat ka juk wa katni iwa da chimtom wow pynkylla noh katni kamtæ da hap wow pyndam noh ya ka soskular neibhah kani ka Company da kwah ko leh wow pyntbian yei jrong kani ka Dam i wym sñiaw yahaap de ka sorkar.
Ka Jaypee Meghalaya Power Ltd, New Delhi kawa da toh wow leh ya ini i kreh da ong ko leh wa kiwi ki daw wa eh wow lai chakhmat toh neidaw wa em Uranium kani ka thaaiñ.
U Montri da ong u leh wa kani hi ka Company wa wan chakhmat nachwa yow tyrwa pynkreh ya kani ka Dam tangwa hadien itæ won wiar hi-eh ko.
Da ong u leh wa boon na ki kreh wa wan da ki Company wow tyrwa u chna ym em ye u lai chakhmat hanla da dep ya soi soskular wei ka sorkar ymtoh ka wa pynbor wow chna ya ini neibhah ka sorkar da yang ko da slem wow leh yeini kamtæ bha wow pyndam wei wow khut da kiwi wow kreh.
Da pyntip u leh wa kani ka Company katni da booh kyndon ko wa hap ka sorkar wow thied bordiñ na ka wei lada dai syad ko daw hap wow e cha ki paidbah hei dor wa duna iwa pyndooh nong ya ka sorkar.
Da ong u leh wa ka sorkar kwah ko wow kreh ya ka Mawphu Project tangwa ki paidbah pyrchah ki kamtæ da ong u wa kat iwa thmu ka sorkar leh da em bait i thut.
Discussion about this post