Uwi u bru wa tip kam u Thoura Darnei uwa na East Jaiñtia Hills da lai kyrpaad u hakhmat ka Meghalaya High Court pyrchah ya ka hukum wa da pymih da ka yung bichaar Special Judge (POCSO), East Jaiñtia Hills heiwa da phah kset ya oo 10 snem deiwa pynchitom bha hadien wa slaitbor u ya ka khynnah kawa dang 4 snem, heiwa ya kani ka hukum da pynmih ha ka 11-03-21.
U Thoura ha ka mukotduma wa da yaleh u ha High Court da ong u wa ym ye wow pynsakhiat wa slaitbor u ya kani ka khynnah neibhah ka Medical Report ymtoh kawa da klam che wa chah slaitbor kani ka khynnah.
Ini toh iwa da jia ha ka 28-05-17 heiwa ya ka ujor da lai booh da ka bei kani ka khynnah ha ka 29-05-17 ha Saipung Police Station.
Katkam wa khana kani ka khynnah kawa dang lai Nursery ha itu i por, da ong ko wa ha katu ka sngi dang em ko ha lait yung ko wei da khut u Thoura ka deiwa kular wow e ya ka da ki Card yalehke wa em ki dur, kamtæ da yah u ka cha yung u wei da rah u ka ha thaw thiah u heiwa da slaitbor u ka wei da kset u leh yei ktien ko da ka that yow lait ko u skiad.
Hadien wa dep u wow slaitbor ka da phah liwan u ka wei heini i por da yoo ka bei ko wym ye ka khon ko wow lai dei miat heiwa da khana kani ka khynnah yeiwa jia ya ka.
Ka bei ko da lai rah ko ya ka wut-wut cha thaw sumaar wa em hajan chnong ki heiwa da phah won ya ki wow lai cha Khliehriat CHC heiwa da wan da ki pulit wow lai yah ki.
Ka High Court hawa pait ya waroh ki sabut nadooh ki Medical Report da ong ko wa da che wa kani ka khynnah chah slaitbor hi ko wei deiwa pait leh ya kiwi ki hukum wa da pynmih ha ki mukotduma wa sariem kam ini, da ong wym ye u kyntait yeiwa phla kani ka khynnah.
Kamtæ da rai wow pynksan ya ka hukum phah kset kawa dadep pynmih chwa wei da phah ya ka sorkar wow e yarap Rs. 7 lak cha kani ka khynnah.
Ya kani ka hukum ka High Court da pynmih ha ka 8 tarik uni u bnai.
Discussion about this post