Ka High Court ka Meghalaya da kyntait ko maap ya uwa slaitbor pyn ya ka khon nah u soo sien heiwa da phah hi wow kset oo 10 snem deiwa pynchitom bha deilang ka kuna wa Rs. 10,000 wei wow su u leh Rs. 3,00,000 cha ka khynnah wa slaitbor u.
Uni u bru wa tip kam u Lios Swer uwa man leh kam uwa sikai skur, da dep chah rai pynrem u ha ka 09-03-23 ha ka yung bichaar u Special Judge (POCSO)/Addl,DC(J), East Jaiñtia Hills District hapoh ki kyndon Section 5(1)/6 ka aiñ POCSO wa Section 506 IPC deiwa phah kset ya oo 10 snem deilang ka kuna wa Rs. 10,000 wei da phah su ya oo leh Rs. 3,00,000 cha kani ka khynnah.
U Lios Swer hakhmat ka High Court da ong u wym em slaitbor u ya kani ka khynnah neibhah wym em sabut wa leh u yeini lait neiwa pynbaad donhi kani ka khynnah waka bei ko wei ki Doctor leh ym ye ki wow ong deiwa tikna wa chah slaibor kani ka khynnah.
Da pynbaad u leh ya u Nilu Nath kam uwa slaitbor ya kani ka khynnah neibhah da chem u wa ka kurim u ya thiah ya dem lang ko wa u Nilu uwa man leh kam u payu u Kamal Nath uwa da khlaad noh uwa man leh kam u kurim nyngkong kani ka bei kani ka khynnah.
Da kdaw u leh wa da chimpor ki hadooh 5 sngi wow e ya ka ujor wei ymtip yei daw wa slem ki wow ujor wei ha ini i por wa ong ki jia ini waroh, kani ka khynnah em ko cha Karimganj, Assam wei ymtip leh yei rta wa sakhiat kani ka khynnah.
Kamtæ da kyrpaad ya ka High Court wow pynkylla ko ya ka hukom wa rai phah kset ya oo.
Ka High Court hawa ap ko ya ki sabut wa da wanrah pyrchah ya u Lios Swer, neiliang u muktiar ka sorkar jylla da pyntip u ka wa kani ka khynnah ha kawi ka step da mih ko napoh yung heipor 6:30 deiwa yaam wei hadien wa kylli iyi wa jia ya ka, da khana ko wa da chah slaitbor ko wei da chah maham pynyap ko, kamtæ da kwah ko wow liwan cha chnong ko wa em ha Karimganj, Assam heiwa da lai yah ya ka da ka bei ko tangwa da wan biang ki cha Khliehriat yow ujor deiwa yarap u waheh chnong deilang wa ki VDP.
Hadien ini, da khana kani ka khynnah wa ini ymtoh i sien wa nyngkong wa jia ya ka heiwa da dep jia la le sien nachwa wa da chah slaitbor ko ha u pa nah ko.
Kani ka khynnah da khana ko hei miet ka 16-06-13 uni u pa nah ko da wan yung u deiwa muaid wei da sdang yamai u wa ka bei ko wei hadien da lai li thiah u, tangwa heipor kamwa 3:00 waje i step da wan u cha kamra thiah kani ka khynnah heiwa da beh ka bei kani ka khynnah oo tangwa da mih biang i ya awri wei da kset u ka ka bei kani ka khynnah cha lait. Heini i por da khut u ya kani ka khynnah cha kamra u wei da slaitbor u ka wei da maham u leh wow pynyap ka lada khana ko ya kiwon kiwon.
Ka Medical Examination Report kani ka khynnah da pynyoo ko leh wa em sakhiat i chah slaitbor kani ko.
Kamtæ ka High Court ha ka 28-06-24 hadien wa bichaar ya kini ki sabut pyrchah ya u Lios Swer da kyntait ko wow pynkylla ya ka hukum wa da pynmih chwa wei da kyntait ko leh wow ngait wa u Nilu Nath wa leh yeini i kaam deiwa ong wa ini toh du iwa chna parom donhi yow murieh yei pap kamwa da chem leh da ka yung bichaar wa bichaar nyngkong yeini.
Discussion about this post