Ym bien ka High Court wow pynduna ya ki 22 snem wa phah kset ya uwa slaitbor ya khynnah wa dang 13 snem ha East Jaiñtia

U Pynchemalangki Bareh uwa da dep chah rai pynrem ha ka 16-06-21 ha ka Special Judge (POCSO), District & Sessions Court, Khliehriat heiwa da pah kset oo 20 snem hapoh ka aiñ POCSO wa ar snem won hapoh ka Section 506 ka IPC hadien wa chem wa slaitbor u ya kawi ka khynnah kawa dang 13 snem ha East Jaiñtia Hills, da lai kyrpaad u hakhmat ka Meghalaya High Court yow pynkylla noh ya kani ka hukum phah kset ya oo.

Kani ka khynnah toh kawa da chah slaitbor ha ka 26-11-19 heiwa ya ka FIR da e da ka bei ka khynnah ha ka sngi wa bood ha Khliehriat Women Police Station, EJH.

U muktiar u Pynchemalangki hawa yasaaid da ong u wa ym ye u pynsakhiat yei snem kani ka khynnah neibhah da pynyoo donhi du ka Baptist Certificate wei kani ka khynnah ye ko wow man kawa da em palat 18 snem, kamtæ ym ye wow pynchitom ya u Pynchemalangki hapoh ka aiñ POCSO.

U muktiar ka sorkar won da ong u wa ka Medical Report da pynyoo ko wa em i chah slaitbor kani ka khynnah wei da em leh ka kot wa pynyoo ya ka sngikha ko iwa ha ka 05-03-2006 wei da chah pynbaptist ko ha ka 18-09-2016.

Related posts

Super Division Saipung: Jop ka Pyrdung wa ka Mulait United

November 23, 2024

Ka Diengshynrum kam ka Champion ka 1st Division 2024 ka East Jaiñtia

November 23, 2024

Katkam wa khana kani ka khynnah, ha ka 26-11-19 heipor kamwa 3:30 i sngi, heipor wa dang kyndeh-ke ko wa uwi u khynnah, da wan syndet u Pynchemalangki wei da rah u ka chapoh iwi i khloo heiwa da slaitbor u ka deiwa ksoh ka hadooh wym ye de ko u khih wei manda mut ko wow kiad, uni u bru da kset u yei ktien ko.

Da maham u leh wow pynyap ka wei wow noh yei metyap ko chapoh krem mooyong.

Da yoh ko wow yut na oo hadien wa yoh ko wow dat oo da u moo na khlieh wei da hap u wow sap sula chwa wow yoh u kdong ka wei da kdong u ka leh hadooh wa poi ko cha yung ko tangwa neidaw wa em u ksaw ki wa chang, da yut noh u khlem da kdong de ka.

Manda poi ko ha yung da khana ko ya ka bei wa ya ka payu ko yeini wa jia.

Ka High Court hawa bichaar yeini waroh da ong ko wa katkam ka Medical Report kani ka khynnah toh ka wym pu em poi bnai, kamtæ ym ye u man kawa da tam 18 snem i rta wei ka Report leh da kdaw che ko wa chah slaitbor kani ka khynnah.

Kamtæ da ong wa i rukom wa dadep chah bichaar u toh iwa biang wa leh da ka yung bichaar ka POCSO, wei hajrong ini ym bien wow pynyklla næ wow pynduna ya ki snem wa phah kset ya u Pynchemalangki.  

Ya kani ka hukum ka High Court da pynmih ha 08-07-24.