Ym bien kiwa thaap ya u wym tip u klam Marathi wow paan maap

Hadien wa chah thaap uwi uwa chongdai dukan harood sarok ka thaaiñ Bhayander, Thane District ka Maharashtra ha ki dkhot ka Maharashtra Navnirman Sena (MNS) du neidaw wym tip u klam Marathi iwa da jia ha ka 1 tarik uni u bnai heiwa yeini wa jia da em wa riñ Video ki.

Ki pulit da pyntikna ki wa kini ki bru wa wan ha kani ka dukan toh ki dkhot ka MNS kawa man ka seiñ wa yahkhmat u Raj Thackeray wei da pyntip wa kini ki bru ym bien ki wow paan maap.

Ka FIR pyrchah ya kini ki bru leh toh kawa dadep e da uni uwa chah thaap uwa tip kam u Babulal Khimji Chaudhary uwa na Rajasthan uwa em yeini i dukan wa tip kam i Jodhpur Sweet Shop.

Kini ki bru ka MNS da wan ki wow thied um na kani ka dukan wei manda yaklam ki wa oo da dawa ki wow klam u dei Marathi ymtoh dei Hindi.

Related posts

Da wai ya ka Bottling Plant ka Pepsi ha Garo Hills kawa heh dooh ha North East

July 30, 2025

Yoh ki skur ka East Jaiñtia Hills da ki Computer

July 30, 2025

Ha ka FIR da pynmih yei pyrtuid ki 7 ngut ki bru heiwa neiliang ka MNS da pyrchah ko yeini deiwa ong wa hei Video da em du 3 ngut ki bru.

Uni uwa chah thaap da rai u wow pynman da ka lai paidbah pyrchah yeini wa jia ya oo wei da yoh u leh yei kyrchaan na kiwa boon kiwi kiwa dai dukan.

Neiliang ka MNS leh ym em kyntait ko yeiwa jia ini heiwa da ong ki wa uni u bru da jia ya oo neidaw wa klam sarong u.

Ha ini i Video da yoo wa hawa pynbor kini ki bru ka MNS wow klam u dei ktien Marathi da jubab u wa deiwa ong wa i klam i boon tylli ki jait ktien wei heini i por chah thaap wot u.

Ini da jia i hadien wa ka sorkar Maharashtra da pyndam ko ya ka hukum wow pynkrehkaam ya ka Three Language Policy hapoh ka jylla kawa da pynbaad ka Liang Pyrchah kawa man wow pynbor ya ki bru wow klam Hindi.

Ka MNS toh kawa da yakhih pyrchah yeini wow pynkrehkaam ya le tylli ki jait ktien ha ki skur ka Maharashtra kam chibynta ka National Education Policy.

Neiliang won u Montri ka sorkar Maharashtra, u Yogesh Kadam da ong u wa ha Maharashtra hap wow klam dei ktien Marathi. Wei lada ym tip Marathi ym mut wow ong wow dam u klam Marathi wei lada em ki wym burom yei ktien Marathi daw pynkrehkaam da ka aiñ. Kitu kiwa dat ya uwa dai dukan ymtoh u chim ki ya ka aiñ ha kti yong ki hi, da toh u ujor ki cha ki bru wa toh u pait yeini.