Uwa yahkhmat ka Bharatiya Janata Party (BJP) uwa man leh u Montri sorkar warim wei u MLA ka Pynthorumkhrah, u Alexander Laloo Hek da khana u wa ka BJP da tyrwa ko ya oo wow mih kam u kyrtong neibynta ka MP Election chiteiñ samoi kawa daw man noh ha ki bnai wow wan.
Da ong u wa neiliang yong oo daw tyrwa u dei pyrtuid u MLA ka South Shillong, u Sanbor Shullai wow yakhun biang ya ka Election MP.
Chooh chooh da khana u wa kiwa yahkhmat wa kynthup ya u President ka BJP, da yachem ki wa oo yow phah yakhun kam u kyrtong ha ka Election MP, tangwa da kyrngah u deiwa ong wa dang boon ki kaam wa hap u pyndep, heiwa da khana u wa ki da ngait ki wei da thooh noh ki da uwi won u kyrtong.
Katkam i ong u Hek, da em kiwa da pynsñiaw wa kwah ki wow yakhun kam u kyrtong ka BJP ha kani ka Election, tangwa da kyntait u wow khana yei pyrtuid.
Hawa kylli hajrong u kyrtong wa da monlang ka sorkar MDA-II, u Hek da ong ha oo hi samen ym sñiaw yahaap u wow em u kyrtong wa monlang lane u Common Candidate wei emkaam wow sai bait da jar jiar u kyrtong neibhah wa sñiaw u wa ka BJP daw lehbha ko kattæ bar ya ki por wa da lai. Da ong u leh wa ka BJP daw pyrchang won ko u yaklam wa ka MDA yow kyrchaanlang ya u kyrtong ka BJP ha kani ka Election MP chiteiñ samoi.
Discussion about this post