Shillong: U Montri ka sorkar pyrdi uwa pait ya i kaam yalehke, u Kiren Rijiju da ong u wa ka Inner Line Permit (ILP) toh ka ‘Political Issue’ wei toh i rai yong ka sorkar India. Da ong u wa ka sorkar pyrdi ka pyrkhat ko neibynta i emkaam yong ki paidbah ka thaaiñ North East, wei neibynta wow yada ya i mantre yong ki paaid ki jaitbru ri-loom, ka sorkar wa yahkhmat da u Montri Rangbahdooh, u Narendra Modi da leh ko ya iwa emkaam neibhah ka pyrkhat ko yei man kyrpang yong ki jaitbru ka thaaiñ.
Da ong u wa ka sorkar India, nalor wa yada ya i man kyrpang wei kyntu ya i mantre yong ki jaitbru, emkaam leh wow pynneh ya ka chong suk chong saaiñ ha ka ri waroh kawi, wei ha i jooh i por yow pait wei sñiawthooh leh ya i emkaam wa i eh ki paidbah ka thaaiñ.
Neiliang u Rijiju da kyntait u wow ong iyi iyi hawa yatoh wa i dawa yong ki seiñbhalang ka jylla neibynta wow pynkohngooh ya ka sorkar bei wow pynkrehkaam ya ka ILP ha kani ka jylla.
Ynne ka sngi hachwa wow wan poi u Montri ka sorkar pyrdi, neiliang ki dkhot ka Khasi Student Union dayang ki hakhmat ka skurbah North Eastern Hill University, deilang wa ki Placard wow dawa ya ka ILP wei pyrchah ya ka CAA, tangwa ini i yang ki dkhot ka KSU da sepai noh ko neibhah wa u Rijiju da hiar bait u da ka Helicopter hadooh ha ka thaw wai yaka madan yalehke ka SAI, ha pchem ka NEHU.
