Jowai: Ki bor pulit ka West Jaiñtia Hills hapoh i yahkhmat u Superintendent of Police, u Lakador Syiem da pyntip u wa ki bor pulit da chong yalang ki wa ki bor pynlai yong ki Dorbar Chnong wa kiwi kiwi wow pynbait ya i chaad pdiang sñiawbha ya u snem thymme namo ka New Years’ Day Celebration ha Jowai neibhah wa man ko ka rukom lehkmen kawa rap phær bha.
Da pyntip u wa da booh ya ka luti wow lai kiwa chaad hadien i lai baamdoh snem thymme (ha ka chi tarik) katwa kamtæ waroh ki Dorbar Chnong hap bood ki ya ki luti wow lai chaad wa da booh.
Ym chah leh ya ki kari ki bru samen wow bood ki ya kiwa chaad yonglang ha kani ka sngi wei u chah du ya ki kari wa kit ya ki tanghæng (Loudspeaker) wa tem ya ki sur neibynta kiwa chaad khnang wa ym em i sah kut ki kari. Ya ki kari ki bru samen ye ki wow pynyieñ ha Stand War, hajan Thomas Jones wa kiwi kiwi.
Ki kari wa kit ya ki sur ye ki u wan haphrang ka MTC Stand heiwa daw em ka Office ka JTES wei hadien wa chaad ki chisien u uiñ biang ki cha jar jiar ki chnong yong ki neibhah daw em hadooh 16-18 tylli ki Dorbar Chnong wow chimbynta.
Ym chah leh ya ki kari wow psiah cha Iawmusiang nadooh 4:00 waje i janmiet hadooh 9:00 waje i miet wei ka Iawmusiang u man ko kam ka No-Vehicle Zone lait noh ya ki kari Emergency.
Da khang pyrchah leh ya ki kari wow pynyieñ ha pchem ka Jowai Police Station neibhah wa lada emkaam ki pulit wow beh yei kaam daw sah kut ki.
Heijooh i por da kyntu ya ki Dorbar Chnong wow thung ki ya jar jiar ki Volunteer wow pynlaibait lai ryntih ya i chaad.
Da pyntip u SP leh wa ha kini ki sngi wow wan ki pulit ka Women Police Station daw uiñ ki talawiar ka Jowai wow pyntikna wa ym em kiwa klam khlemakor (Eve-teasing) ya ki kynthai.
Discussion about this post