Ynne ka sngi ka Synjuk ki Waheh Chnong Jowai da pynman ki ya i lai paidbah hajrong i pyrchah ya i wym mano ka sorkar hajrong wow kit jhep na kylleiñ ka Jowai wei hadien kani ka lai paidbah da pynman ya ka yalang ha Yung Club ka Tympang Iawmusiang.
Hawa yaklam wa kiwa pathai khubor hadien ka yalang neiliang u President ka Synjuk, u Alan Niangti da ong u wa da chim ya ka rai wow yaklam wa ki muktiar hajrong ki kaam wa daw leh ka Synjuk ha ki sngi wow wan, da pyntip u wa la kamwa chi snem kattu ka Synjuk da krehlang ko wa ki bor District heiyatoh wa i yakhun ya ka khlam tangwa ki bor District ymye ko wow kit ya i jhep na Jowai na Iawmusiang wa na ki yung ki sem kamtæ da rai wa ym krehlang de wa ki bor ka District nadooh i yakhun ya ka khlam COVID-19 næ kiwon kiwon ki jait kreh wot wow Boycott namo wow dam u chimbynta ha ka sngi laitlooid ka ri.
U Riquoma RQ Laloo, uwa man kam u Secretary ka Synjuk da ong u wa ha ka yalang da rai wow e da ka Quit Notice namo ymchah de ya kiwa na ki chnong (nadooh na Laad Demthring-Mupyut), ka KSU-Amlarem wa ka Synjuk Waheh Chnong War Jaiñtia wow wan ki cha Jowai khamtam kiwa da mih bha chaphrang wow pyrchah ya i noh jhep ha Mynkjai iwa man i thaw iwa da noh jhep da ki phaw snem kattu.
U Alan da ong u wa lada i dawa yong ki ym krehkaam i, neiliang ka Synjuk daw pynman ko ya ka Public Rally ha ka 17 tarik uni u bnai.
Ka Synjuk da beiñ ko leh yei wym krehkaam ya ka kyndon Section 144 CrPC hajrong i thaw noh-jhep iwa pynyoo yei tlot krehkaam na u DC wa kiwi kiwi.
Da khang ym du ya ki bru wow wan, tangwa wot ya ki kari leh da khang wow wan ki cha Jowai wei ya ka thaw pynyieñ kari namo ka Stand War leh ye noh wow khang ya ka.
