Ka HITO Jaiñtia Hills ynne ka sngi hapoh i yahkhmat u President, u Burom Dkhar, da lai booh dorkhat ko ha u DC ka West Jaiñtia Hills District tangwa neidaw wym em u, da lai e ya ka dorkhat ha ka ADC, ka B. Blah yow dawa pyndooh noh ya ka bai lai luti ha ka Toll Plaza wa em ha Ialong neibynta ki kari ML04.
Ka seiñ da ong ko wa katkam ka kyndon ka National Highways Fee Rules 2008, kiwa toh u pait ya ka Toll Plaza ym ye ki u chim poisa ya ki kari wa lai lyngba uni u sarokbah NH-6 kiwa im hapoh 20 Km wei hajrong kani ka yurim da dawa na u DC wow pynlait noh ya ki kari ML04.
Ka seiñ da ong ko leh wa da yoo yei chah ktah ki chnong wa em marjan kam ka Kyndong Tuber, Mynso, Muthlong Phramer, Shangpung, Jowai wa kiwi kiwi ki chnong hapoh ka West Jaiñtia Hills District kiwa lai cha ki yaaw ki haat, kiwa lai khayi pateiñ, kiwa lai chim dawai wa kiwa kreh man-ka-sngi.
Chooh chooh da ong wa ki kari ML04 toh u lait ki nei su ha katai ka Toll Plaza kam kiwa chong chnong ka District kamwa jia ha Ri-Bhoi heiwa ki kari ML10 lait ki khlem su.
Da kyntu leh ya ki tre kari wa em Number ML04 wym toh u su wei lada kiwa pynlai ya ka Toll Plaza ym pynlait ki wei yoohbeiñ ki yei hok ki paidbah, ka seiñ da kyntu ko ya ki paidbah wow pyntip cha ka wei daw pyrkhat ko da kawi ka laad ka luti.
Discussion about this post