Ka Supreme Court ka ri India, ynne da kyntait ko wow pynsangeh ya ka hukum ka Patna High Court kawa da tynyap yei rai ka sorkar Bihar yow pynku ya ka bhah namo ka Quota na ka 50% cha ka 65% neibynta ki Backward Classes, Extremely Backward Classes, Scheduled Caste wa ki Scheduled Tribe kiwa em ha Bihar.
Ka sorkar Bihar ynnin u snem da pynman ko ya ka Caste Survey chwa wow chim ya kani ka rai wow pynku ya ka bhah neibynta kiwa dang sahdien wei kani ka Quota man ko ha ki thaw kreh wa ki thaw puræ wa em ha Bihar.
Ka High Court ha ka 20 tarik u Naiynru da chim rai ko wa ini i pynkylla ya ka Quota ha u Khonchonglad (Nov) 2023 man ko iwa da leh palat yei bor wa ye ka sorkar, kawa ym em miat kam ka aiñ wei da tyngkheiñ leh yei hok wow yoh laad salonsar.
Chooh chooh ka High Court da ong ko wa lada jia katwa jia leh ym ye wow pyntam 50% ka Reservation katkam wa da dep pynmih hukum ka Supreme Court ha ka Indra Sawhney Case.
Ka High Court da ong ko wa ka sorkar da chim ko yeini i rai deiwa kheiñ yei boon paidbah ha kiwa boon ki jait tangwa ym em won kheiñ katwon ngut da em chwa ha ki kreh sorkar wa ki thaw puræ.
Kam wow kdaw heini wa ka Bihar Assembly ha u 2023 da pynkylla ko ya ka Bihar Reservation of Vacancies in Posts and Services Act, waka The Bihar (In admission in Educational Institutions) Reservation Act, yow pynku noh yei bhah yoh kreh wa ha ki thaw lai puræ neibynta ki Backward Classes, Extremely Backward Classes, Scheduled Tribes wa Scheduled Castes na 50% cha 65%.
Deiwa pynkylla thymme, ka Quota waroh dapoi ko 75% ha Bihar wa kynthup ya 20% ya ki SC, 2% ya ki ST, 25% ya ki Extremely Backward Classes, 18% ya ki Other Backward Classes (OBC) wa 10% ya ki Economically Backward Classes.
Kamtæ ini i pynkylla da man ko pyrchah ya ka Equality Clause hapoh ka Article 14, 15 wa 16 ka Constitution, da ong ka Patna HC.
Discussion about this post