Hadien wa da pynbna paidbah yei lai yabi noh ki 12 ngut ki MLA ka Congress cha ka All India Trinamool Congress, ynne i janmiet ka 25 tarik, waroh 12 ngut ki MLA hapoh i yahkhmat yong Dr. Mukul Sangma da lai ki wow yachem biang ya u Lamphang yong ka yung dorbar chna-aiñ neibynta wow yoh yei tipmit noh ya kini ki MLA katkam ka aiñ.
Ynnin i janmiet neiliang ki 12 ngut ki MLA hapoh i yahkhmat u Dr. Mukul Sangma da dep ki wow pyntip cha u Lamphang, u Metbah Lyngdoh yei em ki MLA ki kiwa da pynyabi noh wa ka TMC, wei ini i lai ynne ka sngi hakhmat u Lamphang toh wow pynyoo yei boon paaid wow rah leh deilang i soi yong waroh 12 ngut ki MLA.
Hawa klam wa ki laad pathai khubor, u Metbah Lyngdoh da ong u wa katkam ki kyndon ha ka 10 Schedule, emkaam 2 na ka 3 bhah (Two Third) i boonpaaid wow mih na kawon kawon ka seiñ saiñpyrthai, wei da ong wa kamwa da yoo wa ki MLA kiwa da mih na ka Congress ym chah ktah de ki ha ka aiñ yut seiñ.
U Lamphang da pyntip u wa da yoh pdiang ya ka chithi na ki 12 ngut ki MLA ynnin ka sngi, heiwa da pynsñiaw wa daw lai pynyabi noh wa ka TMC, deiwa pyntip leh wa da yoh ya ka chithi na u General Secretary ka TMC, u Abhishek Banerjee uwa da e khublei wei pdiang sñiawbha ya ki 12 ngut ki MLA cha ka TMC.
Hawa kylli, u Metbah da ong wa hanla ym chah ktah de ha ka aiñ, tangwa neiliang ka yung krehkaam yong oo dang hap wow bichaar bniah ya waroh iwa emkaam wow pyntikna wa iyi kiwa toh u leh katkam ka aiñ.
