Neiliang ki VEC ka Lumshnong C&RD Block kawa dang haap hapoh i pait ka Wapung C&RD Block, da pynbaad ki wym kheiñ u Dr. T. Shylla, BDO ya ki iyi iyi leh heiwa ym chah u leh ya ki VEC kiwa em hapoh ka Lumshnong C&RD Block wow pyndap (Enter) ya ki Materials Bill yong ki, kiwa ki VEC dadep pynkreh ki hachwa u Financial Year 2023-2024, wei wot hadien kani ka Financial Year leh ym chah wow pyndap ya ki Materials Bill yong ki VEC na ki chnong waphær waphær kiwa em hapoh ka Lumshnong C&RD Block wot hadien wa dadep yei kreh ka MGNREGA wei kiwa da lai e leh ya ki Utilization Certificate (UC) cha ka Wapung C&RD Block.
Da pynbaad leh wa uni u BDO ym chah u ya kiwa kreh u wow pyndap ki ya kini ki Materials Bill yong ka Lumshnong C&RD Block, wei hawa ki VEC Lumshnong C&RD Block da kylli ki na utai u BDO weileh ym chah u? Da jubab u wa toh ka sorkar jylla wym chah ko wow pyndap ya ki Materials Bill yong ki.
Kamtæ hadien wa yaichah da ki snem, kiwa kitkaam yong ka VEC Lumshnong C&RD Block Association ha ka 27-08-24 da lai ki wow yachem wa ka Joint Mission Director State Rural Employment Society (SRES) ka sorkar Meghalaya, yow yoh yei pynche, heiwa neiliang ka I. Diengdoh kawa man ka Joint Mission Director da ong ko wym em kam katæ ka aiñ, wei da pynche ko leh wa ka Lumshnong C&RD Block ym em kyrriah ka na Wapung C&RD Block, kamtæ waroh ki kaam dang toh ki kaamram yong utai u BDO uwa pait yei krehkaam yong waroh ar tylli ki Block, wei ymtoh wow leh chiliang u kamtai.
Da khana ko leh wa dadep wow pynlait ya ka bai mar kamjooh ki tiar (Materials) yong waroh ar tylli kini Block kawa duna Rs. 15 klur ha kani ka Financial Year 2023-2024, da khana ko leh wa ya ka Lumshnong C&RD Block da mang kyrpang neibhah wa toh ka Block wa thymme.
Hawa tip yeini, waroh ki VEC wa em hapoh ka C&RD Block Lumshnong da pynsñiaw ki yei sñiawngooh ya ka sorkar jylla wa da pynlait ya katai ka poisa, tangwa waroh ini wa jia toh deiwa leh donhi u BDO wei ymtip leh yei daw wa utai u BDO wym chah u wow pyndap ya ki Materials Bill ki VEC kiwa em hapoh Lumshnong C&RD Block iwa da khang laad ya ki VEC wow kreh MGNREGA kawa man du kani ka Scheme wa e myntoi cha ki thaaiñ palatsor wei da em leh ki VEC kiwa sahteiñ ka bai Materials nadooh u snem 2021-2022, 2022-2023 wa 2023-2024.
Wei na i daw wa chah leh chiliang ha utai u BDO, ki VEC da rai ki wow sangeh kreh MGNREGA ha uni u snem 2024, wei neiliang ka VEC Lumshnong C&RD Block Association da khana chooh chooh wa uni u BDO ym jooh khut pynman yalang (Meeting) ya ki VEC kiwa em ha Lumshnong C&RD Block.
Discussion about this post