Kat dang tia ki sngi cha ka 27 tarik u Thohlakhmi wow thap Vote neibynta ka Election MLA 2023, kattæ leh ki Dorbar Chnong leh pynmih ki ya ki kyndon neibynta i wan yalap Election ki kyrtong ha jar jiar ki chnong yong ki.
Ha kani ka kynti neiliang ka Dorbar Chnong Loomiongkjam, Jowai da pynbna ko ya ki kyndon wow bood ki kyrtong hawa wan yalap hapoh ka chnong katkam ka rai ka Executive Committee ka chnong wa da man ha ka 25 tarik uni u bnai kam chibynta wow pynneh yei chongsuk chongsaaiñ wa i khooid i jngiar hapoh ka chnong heipor Election deiwa booh ya ki kyndon heiyatoh wa ini i kaam.
U kyrtong ye u wow wanrah du 10 ngut kiwa na baar chnong khnang wa ki khon ka chnong u ye ki wow ap ya ki yurim wa u kyrtong kwah u wow pynsñiaw cha ki.
Heijooh i por u chah du le tylli ki kari khian ki wow wan kini ki 10 ngut chirup wa u kyrtong.
Da khang ya ki tre chnong wow klam ha rynsan ha kini ki yalang yalap Election neibynta ki kyrtong kiwa wan ha ka chnong.
Chooh chooh da khang ya ki kari wow tem pynhæh ya ki sur Election la yong kiwon kiwon ki kyrtong wot kiwi tawon ki jait sur hapoh ka chnong.
Ini toh katkam ka Wyrta na u Waheh Chnong wa u Secretary ka Dorbar Chnong, Jowai.
