Ka Langrin Youth Welfare Association (LYWA) deilang wa ki paidbah chong chnong yong ka thaaiñ, da pynsñiaw ki wa yieñ skem ha ka yurim wow pyrchah ya i tih Uranium ha Domïasiat, Nongbah Jynrin lane na iwon iwon i bynta yong ka thaaiñ.
I piah i pdung ki Tank wa kset ya ki jhep wa ki pui pui Uranium ha ka chnong yong ki dang ini wa dap da ong ka seiñ wa da ktah ko hadooh kattæ kattæ wei booh ko katni hei maa ya ki paidbah wa chong chnong yong ki wei kamjooh leh ya kiwi ki para chnong wa marjan ka thaaiñ naka la-ær bih yong u Uranium.
Da kam leh wa nadooh wa tih ya utai u marpohkhyndaw, ki jait pa ki jait kjut da wan ki nadooh i Cancer, Blood Cancer, Tuberculosis (TB) da sdang yoh ki bru ka thaaiñ.
Da ong u leh wa i pynbna yong ka sorkar wow phah Test ya katæ ka Radiation ha kitæ ki Expert kiwa naka skurbah NEHU wa na IT Guwahati kamjooh na ka AMD toh iwa ym em yumut næ iwa ym wanrah myntoi iyi iyi leh, neibhah wa da tip che wa ki daw e ki yaka Report kawa bakla neibhah wa em ki chnat ha NEHU kiwa jooh yoh yarap wei kyrchaan na ki Agency yong ka UCIL wow leh Research ha kawa yatoh wa u Uranium kam ka Bhabha Atomic Research Centre (BARC) kawa ka Headquarter toh kawa em ha Trombay, Mumbai, Maharashtra wa kiwi de ki Agency kiwa yatoh kaam wa ka UCIL.
Kamtæ da ong wa kammon u chaniah ha ka AMD kawa toh ka hi kawa nachwa deilang waka UCIL kiwa da dep tih ya u Uranium, wei kammon da kitai hi u wan batai wei pynche hajrong i chah ktah wa i wym ktah ya i chait i khiah hawa toh ki hi kiwa kwah wei thrang dik dik wow yoh u tih biang sa chisien.
Na kini ki daw da ong wa da che kdar wa ka sorkar yong i toh u suri kup snieh langbrot, kawa hakhmat da pynsñiaw kam kawa sñiawkhia bha hajrong ini tangwa hadien won i thmu toh wow pynbiej ke ya ki paidbah. Tangwa smat wow pdiang lada ka sorkar ka sñiawkhia sakhiat ko ya i yap i im deiwa phah da ki Independent Expert kiwa na kylleiñ ki ri ka pyrthai kam na Oxford, Harvard University ym du na India, kiwa yieñ hapyrdi wei ki wym chah chiliang na kiwon kiwon khnang wow e ki yei batai kawa bait thij ya i yong sakhiat.
Ka seiñ wa ki paaid chong chnong waroh kawi da paan ki yei kyrchaan na ki khon ka Bri u Ynñiawtrep wow e yaka kti timun tidiang hajrong kani ka kaam wa yatoh wa i yap i im.
Da pynsñiaw leh yei sñiawngooh ya ka Khasi Students’ Union (KSU), u Dr. Wanbantei Bremly Lyngdoh, ki bru samen wei khmatam dooh ya u MLA yong ka Mylliem Constituency u Hamletson Dohling uwa man leh u Montri yong ka sorkar jylla, u Chairman ka NESO u Samuel B. Jyrwa kiwa da chimkhia sakhiat wei kiwa smat wow ksohkti lang yow lai hiar lai pait yei piah wa i wym biang ha katai ka paar Uranium.
