U General Secretary ka Jaiñtia Student Union uwa man leh u dkhot ka Joint Action Committee wa pyrchah ya i thmu chna ya ka Dam ha Umngot, u Treibor R Suchen da ong u wa i klam yong u Montri ka chnat Bordiñ, u James P K Sangma man ko ka wym che bha, neibhah da ong u wa lada ka sorkar u pynkreh ko ya katai ka Project toh u ya syllok wa waroh kiwa embynta.
Da ong u wa i klam u Montri ye u man wa em ar tylli ki yumut, iwi toh wa em yumut hi wow lai chakhmat ya itai i thmu, wei iwa sñiaw klumar wa ka dang yaklam sah won ya ka MoU kawa da soi ha u snem 2012-13 da ka sorkar warim wow Dam ya ka wah Umngot, heiwa da ong wa i klam yong u James da thaw hajrong katai ka MoU wa ka Company JP Group wa da leh da ka sorkar warim.
Da ong u wa ha u Naisaphra, 2020 ka sorkar da rai kow wo pyndam ya ka MoU wa ka JP Group, tangwa iwa lyngngoh wa ha u Naitung (Apr), 2021 da pynman won ya ka Public Hearing. Da ong u wa ka sorkar ym kwah ko wow klam che hawa yatoh wow Dam ya ka wah Umgot, tangwa neiliang ka JAC ka phah ko ya ka khubor kawa che wa wa toh u man chi sur, neibhah i dawa yong ka JAC man bait ko wow pyndam ya katai ka Project.
Kam wow pynkynmoo wa u Montri wa pait ya ka chnat Bordiñ ha ka jylla, u James PK Sangma da ong u wa ka sorkar ym em ko yei thmu wow e cha ki Company næ wow chna ya katai ka Dam, wei ka sorkar ka da dep ko leh wow pyndam ya ka Memorandum of Understanding (MoU) wa yatoh wa ka Umngot Hydro Power Project, heiwa da pynsñiaw u leh yei lyngngoh yei mih kam itai i tieñ wa pynman ya ki paidbah wow pyrchah.
