I iñ syndet wa joor iwi i yung ha ka 14 tarik ha Thana Road, Khyndailad hadooh ynne ka sngi ympu chemdien yei daw wa sdang ini i diñ wei ki pulit dang takit bniah ki yeini wei ym tip yei daw neibhah ym too tikna toh nei pdung u kum LPG.
Hawa yaklam wa u Francis G. Kharshiing (IPS) uwa man u Inspector General of Police (Fire & Emergency Services), da ong u wa hadooh katni ympu ye u pynche lada toh na u kum LPG namo na kiwi ki daw wei ye leh u man nei thut ka bordiñ ha ini i yung neibhah ym em ki bru wa chet wa tu ha ini i yung wei ki kum Gas wa pdung leh toh hadien wa poor i diñ.
Heiyatoh wa i duna ki pulit tymplæh diñ, heiwa da hap yakhun da ki jooh ki bru yei diñ, da ong u wa em i duna bru heipor wa jia wa joor i diñ tangwa ymtoh wa yakhun du da kini ki pulit tangwa da khut leh ya ki pulit na Training Center, Mairang wa kiwi kiwa jan.
Hajrong i chah pynbaad wa ki Mock Drill ym man ki kiwa jop heipor wa wan i jia wa sñiawsih, u Kharshiing da ong u wa ki Mock Drill da yarap ki kam ha ini iwa da jia heiwa ki chnat sorkar waphær waphær da man ki kiwa da pynkhreh deiwa pynrap leh wa lada ym leh ya ki Mock Drill daw chah pynbaad bait ki.
Heiyatoh wa i chah ktah ki paidbah na i sahkut ki kari, da ong u wa kam kini jooh jia ki manda jia i wym poi pyrkhat wei ki jiat eh da mih bait ki, tangwa emkaam leh yei burom markylliang, khamtam wow pynlait luti ya ki Ambulance kiwa kit ya kiwa kjut wa chitom wa kamjooh ya ki kari tymplæh diñ.
Da kyntu u leh ya ki paidbah wa lada tip wa em i jia wa syndet emkaam wow dam ki u sai kari namo wow dam u mih kawa man ka yarap wow pynduna yei eh.
Discussion about this post