Ka Joint Action Committee Against Casino Ri-Bhoi District kawa da seiñ yow pyrchah yei booh Casino ha Ri-Bhoi da yachem ki wa u Montri Rangbah ka jylla, u Conrad Sangma ynnin ka sngi yow pynsñiaw yei pyrchah neidaw wa man ko pyrchah yei mon ki paidbah.
Da ong wa lada wanrah ya kani ka Casino daw pynkylla ko yei rukom im ki bru wei daw sdang boon ki kaam wa sih, ki kaam pyrchah aiñ kiwa daw ktah khamtam ya ki khynroo.
Neiliang u Conrad da pyntip u wa da pyndam noh ya ini i thmu ka sorkar.
Kam wow pynkynmoo ka sorkar da pyrkhat ko wow booh ya ka Casino ha khappood waka Assam yow man ko leh neibynta kiwa wanke chapoh ka jylla wei da mang khatam ya kiwa na Assam dei wym chah ya kiwa napoh ka jylla Meghalaya.
Hapoh kani ka JAC da em leh ki seiñbhalang wa ka Synjuk ki Rangbah Shnong Ri-Bhoi kiwa da e leh ya ka dorkhat wow pyrchah ya kani ka Casino.
Hadien wa yachem wa u Montri Rangbah, neiliang ki dkhot ka JAC da pynsñiaw ki yei kmen wa da pyntip cha ki wa da pyndam noh ka sorkar ya ini i thmu wow booh Casino.
Da ong ki leh wa ini i thmu ka sorkar ym yoh ko yei kyrchaan ki paidbah wei ka sorkar leh da bien ko wow ap yeini kamtæ da pynsñiaw ki yei kmen ya ini i yachem wa u Montri Rangbah.
